Sábado á tarde, centos de persoas amoréanse nos centros comerciais e centros urbanos do país. Os locais de comida rápida engolen e devolven familias e grupos de adolescentes. Máis tarde, á mesma hora do partido de fútbol que protagonice a fin de semana, estes mesmos restaurantes enviarán á noite os seus repartidores, que chegarán aos domicilios cargados de hamburguesas, refrescos ou patacas fritidas.
Cando abramos a porta da nosa vivenda para recoller a pizza ou nos acheguemos pedir no McDonald’s que corresponda, a cara máis común que atoparemos será a dunha persoa moza –de entre 19 e 25 anos–, estudante e cun contrato por horas. Perante estas condicións, o sector non acostuma manter as súas traballadoras máis de tres anos.
O último elo do sector hostaleiro
“Se ti agora vas procurar traballo en calquera centro comercial, ves que pasa en calquera restaurante de comida rápida, en calquera tenda de Inditex… Agora é moi difícil atopar un traballo que sexa de xornada completa”, conta Sara Reina, asesora da CUT e con perto dunha década de experiencia como empregada en restaurantes de comida rápida na Galiza e en Catalunya. As condicións están avaladas polo propio convenio estatal que rexe estas empresas.