A caída de 15% do Deutsche Bank na apertura do día xera turbulencias na bolsa da UE

O Deutsche Bank, a maior entidade financeira de Alemaña, chegaba a perder perto de 15% na bolsa esta sexta feira, tras unha repunta do prezo dos seguros de falta de pagamento un día antes, e xerou preocupación pola estabilidade dos bancos da Unión Europea (UE) despois da crise do Credit Suisse e outros bancos estadounidenses. Finalmente, tras unha recuperación ao final da sesión, as accións do banco alemán ficaron nunha caída de 8,53% respecto da xornada anterior, nun retroceso que lle supón a terceira xornada consecutiva en números vermellos. En total, o valor da entidade financeira xa perdeu máis dunha quinta parte do seu valor no que vai de mes. Credit Suisse afunde en bolsa e reaviva o temor no sector bancario tras a creba de Signature e SVB A situación da entidade alemá arrastrou todo o sector bancario da UE. No caso das empresas dos bancos do Estado español, os seis que cotizan en bolsa experimentaron importantes caídas: Bankinter (-5,38%), BBVA (-4,43%), Banco Sabadell (-4,28%), Unicaja Banco (-4,06%), Banco Santander (-3%) e Caixabank (-2,95%). As maiores caídas foron a do danés Sydbank (-10,88%) e a do escandinavo Nordea Bank (-9,76%). Pola súa parte, o suízo UBS, que vén de comprar Credit Suisse, cotizaba cunha caída de 3,55%. A pesar destes datos, os xefes de Estado e de Goberno da UE, reunidos nunha cimeira extraordinaria en Bruxelas, insistiron esta sexta feira en defender a solidez dos bancos comunitarios, á vez que pediron non baixar a garda e retomar os "esforzos" para completar a Unión Bancaria. "Seguimos comprometidos cunha estreita coordinación das nosas políticas económicas, con vistas a aumentar a resistencia das nosas economías", indica a declaración do encontro, na que os líderes convidaron o Eurogrupo a seguir supervisando "estreitamente" a evolución económica, ademais de pedir que se intensifiquen os esforzos colectivos para facer avanzar a Unión de Mercados de Capitais. No texto tamén sinalan que a Unión Bancaria reforzou "de forma significativa" a resistencia do sistema bancario da UE, que é "resistente, con sólidas posicións de capital e liquidez", polo que instaron a que prosigan os "esforzos" para completar a Unión Bancaria en consonancia coa declaración do Eurogrupo do pasado verán de 2022. O BCE abre a porta a dar liquidez ao sector da banca A pesar destas mensaxes de confianza no sector financeiro, a presidenta do Banco Central Europeo (BCE), Christine Lagarde, apresurouse a asegurar aos representantes dos Estados que o conxunto de instrumentos da entidade financeira está "plenamente equipado" para proporcionar liquidez ao sistema financeiro da zona do euro no caso de que fose necesario. "Non hai razón para estar preocupados", sinalou scholz Ao respecto da intervención de Lagarde pronunciouse o chanceler alemán, Olaf Scholz, que valorou os "progresos" do BCE para combater a inflación, do mesmo modo que "aplaudiu" que "durante moitos anos tomáronse as decisións correctas para estabilizar á banca na UE". Así mesmo, o representante alemán incidiu en que Deutsche Bank é unha entidade "rendíbel" que modernizou "o seu modelo de negocio" polo que "non hai razón" para estar preocupados. Fondo de garantías Na súa intervención tras a reunión, o presidente do Goberno do Estado español, Pedro Sánchez, celebrou que a UE aprendese e extraese leccións da crise financeira de 2008, da que considerou que serviu para estar "máis preparados", á vez que defendeu un Fondo de Garantías que sexa "común" e que vaia máis aló das reformas estatais. A creba de dous grandes bancos dos EUA causa "pánico" nos mercados globais "Os cimentos dos bancos europeos son sólidos e podemos celebrar a esixencia das normas sobre a materia", destacou o presidente francés, Emmanuel Macron, quen resaltou que a eurozona aprendeu "de crises pasadas" e converteuse na área económica onde os bancos son "máis sólidos" porque é onde se seguiron de maneira "máis escrupulosa" as ratios bancarias de solvencia e liquidez. O francés incidiu tamén na necesidade de acelerar a Unión Bancaria e de Mercados de Capitais, para permitir ás empresas da UE unha base máis "sólida" para financiar as súas actividades e ter estratexias macroeconómicas "mellor adaptadas". Unión Bancaria O presidente do Eurogrupo, Paschal Donohoe, convidou esta sexta feira os xefes de Estado e de Goberno da UE a avanzar para culminar a Unión Bancaria tras as recentes turbulencias bancarias. "Os recentes acontecementos nos mercados financeiros lémbrannos a necesidade de permanecer vixiantes e seguir controlando os riscos", sinalou o irlandés. A Unión Bancaria foi creada en 2014 para regular e supervisar o sector financeiro da UE. A pesar das mensaxes unánimes de maior integración neste ámbito a través da equiparación de normativas, os xefes de Estado e de Goberno seguen sen ter consenso sobre un aspecto crítico como é a creación dun Fondo de Garantías comunitario, é dicir, un fondo común para cubrir os depósitos bancarios antes eventuais crebas financeiras. Neste sentido, o Eurogrupo, na súa reunión do pasado 22 de xuño de 2022, decidiu sacar da axenda todo o relacionado co proceso de construción deste Fondo de Garantía de Depósitos da UE. Ao respecto, a presidenta do BCE, Christine Lagarde, emprazou esta sexta feira os líderes comunitarios para avanzar na culminación da Unión Bancaria e a seguir traballando para crear mercados de capitais "verdadeiramente europeos". Xosé Díaz: "A responsabilidade da banca non mellorou despois da crise de 2009" Para o economista Xosé Díaz é normal que a forte caída do Deutsche Bank ao comezo desta sexta feira xerara nervios no sector bancario da Unión Europea (UE), pois na súa opinión, unha eventual quebra da principal entidade financeira alemá "sería realmente moi perigosa". O sector da banca, di, "e sobre todo os bancos demasiado grandes, teñen a seguridade de saber que non van caer porque o Estado vainos sustentar". Por isto, sinala, "é moi sinxelo que caían nun comportamento irresponsábel, cando non temerario". "A gran banca sabe que vai ser sustentada polo Estado", di Díaz "Despois de 2009 a responsabilidade dos bancos non só non mellorou, senón que empeorou, e as consecuencias están empezando a verse agora, e isto é un castelo de naipes, cando cae un, a continuación empezan a caer todos por detrás", acrecenta Díaz. Até 50 entidades bancarias máis dos Estados Unidos están en risco de colapso financeiro Sobre a posibilidade de que a UE continúe avanzando na integración no seo da Unión Bancaria, o economista sinala que "iso non vai solucionar todos os movementos de extremo risco como no caso dos produtos financeiros derivados ou do comportamento da banca na sombra e nos paraísos fiscais". "Xa hai tempo que puideron optar por facer unha verdadeira integración en termos de Unión Bancaria, mais non quixeron", engade. Díaz incide en que "a UE ten un defecto moi grande, que se trata dunha unión e financeira e non política". O economista sinala as operacións con derivados como "as máis perigosas" e lembra que "xa nos levaron á anterior crise financeira". Sobre elas, di, "son auténticas apostas que se fundamentan na evolución a futuro dun índice, dunha bolsa ou dun produto determinado".