O goberno español calcula que a contracción da economía será do 0,5% en 2013. Unha estimación que a Comisión europea vén de desbaratar, advertindo ao executivo de Mariano Rajoy que o escenario vai ser moito peor. Desde Bruxelas sinálase que a economía española decrecerá un 1,4% este ano e outro 1,4% en 2013, para alén de advertir que o desemprego será nese exercicio superior ao 26,6 por cento.
Segundo as contas da Comisión europea, só en 2014 a economía española comezará a dar indicios dunha certa, aínda que pequena e lenta, recuperación. O que non implica que iso se traduza na xeración de emprego.
Incumprimento do déficit
Con estes cálculos na man, Bruxelas dá xa por desbotado que o Estado español cumpra cos seus obxectivos de déficit pactados coa UE para estes tres anos. Para 2013, a UE estima que o défict estará no 6%, e no 2014 no 6,4%. Moi por riba do que prevía o goberno de Mariano Rajoy.
Eloxia a reforma laboral, mais apunta que haberá máis desemprego
O Executivo comunitario eloxia a reforma laboral por introducir unha maior flexibilidade mais avisa de que "debido á actual febleza da economía española e ao relativamente corto período desde a súa entrada en vigor, pode costar algún tempo antes de que os seus primeiros efectos positivos se manifesten".
A taxa de paro situarase de media no 25,1% este ano, no 26,6% en 2013 e no 26,1% en 2014.
Rescate
Bruxelas cre que o rescate bancario de até 100.000 millóns de euros concedido pola UE terá "un impacto positivo na estabilidade do sector financeiro en España". "Con todo, a corto prazo o necesario axuste nos fluxos de crédito tras o estoupido da burbulla do sector da construción manterá limitados os fluxos de crédito á economía real, contribuíndo á febleza do consumo privado e ao investimento", admite.