Rajoy debe incluír os problemas do sector lácteo galego na axenda da súa reunión con Angela Merkel, que visita Galiza os próximos 24 -domingo- e 25 de agosto -segunda feira. Así llo piden BNG e FRUGA, que esta sexta feira ofereceron unha comparecencia informativa conxunta.
A deputada do BNG Tereixa Paz, a portavoz nacionalista perante a Eurocámara, Ana Miranda, e o coordenador de sectores gandeiros da FRUGA, Elías Somoz, compareceron perante os meios para denunciar o “acoso” ao que estaría submetido o sector lácteo galego e para demandar a Rajoy que adopte decisións políticas que melloren súa situación.
Tereixa Paz emprazou a Rajoy e a Feijóo a “mudar a axenda” e a abordar na cimeira con Merkel os problemas do lácteo galego, ameazado por “multas por sobreprodución, alugueres fraudulentos de cotas e inasumíbeis baixadas de prezos na produción”, segundo un comuicado de imprensa facilitado pola formación frentista.
“O único que temos é un banco de terras crioxenizado polo Partido popular e concentracións parcelarias paralizadas”
Quer o BNG que Rajoy, no canto de pelexar por colocar Arias Cañete e a De Guindos na Comisión Europea, poña por diante a defensa dos intereses do sector lácteo galego. Aliás, Tereixa Paz perguntouse “onde están” os 700 millóns de euros que se ían destinar ao plano estratéxico para a produción leiteira da Galiza. Non están en ningures: “O único que temos é un banco de terras crioxenizado polo Partido popular e concentracións parcelarias paralizadas”.
Por súa parte, segundo informa o BNG, o coordenador de sectores gandeiros da FRUGA dixo que a situación do sector vén definida pola ameaza da supertaxa e a baixada dos prezos desde o inicio da campaña o 1 de abril. A FRUGA reclama que non se aplique a multa por sobreprodución e pide unha aterraxe suave da fin das cotas europeas.
A ese mesmo conceito de aterraxe suave apelou a portavoz do BNG perante a Eurocámara., que anunciou a apresentación de diversas iniciativas en Bruxelas. Para Ana Miranda, as administracións non están a defender os intereres do sector lácteo galego: “A baixada de prezos das industrias, a ameaza de multas por supertaxa, o veto ruso e o reposicionamento dalgúns países europeos no mercado do leite deixa ao noso sector nunha situación moi complicada” lamentou.