Máis dun centenar de bateeiros arrodearon na mañá desta quinta feira as oficinas da Xunta en San Caetano, en Santiago, para protestar contra as delimitacións das zonas para recoller a mexilla impostas pola Consellaría do Mar. Coches, furgonetas e até lanchas a bordo dun remolque volveron colapsar sorpresivamente, como hai unha semana, as estradas da capital galega, e patrullas da Policía Local tiveron que regular o tráfico en varias rúas.
Fronte ao portal grande de San Caetano, os participantes nesta protesta fixeron soar as bucinas e os megáfonos á vez que pediron a dimisión da conselleira, Rosa Quintana, á que se referiron ironicamente como "percebeira". O presidente da Asociación de Mexilloeiros da Illa de Arousa, José Manuel Oubiña, explicou que o que queren os bateeiros é que os deixen "traballar" a mexilla, que é "a semente do futuro mexillón".
Acusou a Consellaría de restrinxir "moitas zonas" nas que levaban "70 anos colleitando mexilla e nunca houbo problemas", até que o ano pasado fecharon. Segundo cálculos desta asociación, que aglutina propietarios dunhas 2.000 bateas, "80% da mexilla saía desas zonas" agora vetadas.
Para compensar esta medida, a comezos de febreiro a Xunta decidiu abrir arredor de 120 quilómetros de porto para a recolección do produto, pero Oubiña insistiu en que "non vale para as bateas". "Como se abren 300 quilómetros", engadiu.
Ante este panorama, o presidente do colectivo arousán advertiu que está "moi en risco" a próxima campaña do mexillón "e os postos de traballo indirectos" que crea, cunha baixada da produción que estimou "entre 30 e 40%".
"Non nos negamos a que pasemos puntos de control, que nos miren... O único que pedimos é que nos deixen traballar, non pedimos subvencións nin nada", resolveu Oubiña, en declaracións ante os medios.