O vicepresidente e responsábel de Turismo da Deputación da Coruña, Xosé Regueira, convida os concellos a facer uso das axudas para contratación de persoal técnico do sector turístico, co gallo de deseñar novas estratexias para facer fronte á crise provocada pola COVID-19. "O sector vai ter que dar un xiro substancial para abrir novos camiños para sobrevivir", sinala.
Os orzamentos desta vía van destinados á contratación de persoal técnico de turismo de concellos de menos de 50.0000 habitantes, 57 en total. En edicións anteriores, xa se utilizaron para empregar profesionais para o servizo de información turística, de maneira especial, nas tempadas altas. Porén, agora poderían utilizarse para dotar os municipios de persoal técnico que acompañe a saída da crise. "O turismo está a dar un xiro inmenso e neste momento xa desapareceu mesmo o concepto de tempada alta", manifestou Regueira.
Neste senso, as axudas permitirían "deseñar novos produtos que se adapten á nova situación, ademais de acompañar o sector privado dos municipios para sobrevivir despois desta crise".
Turismo sostíbel
Baseándose nos poucos estudos feitos até o momento, o vicepresidente apunta que "reavivar o sector turístico e vencer o medo das persoas á pandemia" implicará esforzos para achegar ofertas con "garantías de seguridade, fundamentalmente cun turismo de natureza e non masificado", o que observa como unha oportunidade para "desenvolver os recursos dos concellos pequenos". Así, propón apostar nun sector de proximidade, estimulando as galegas a coñecer o propio territorio.
