As axudas da Xunta e do Ministerio discriminan as granxas galegas

O Ministerio acaba de establecer un orzamento de 300 millóns de euros no marco das denominadas medidas para paliar as consecuencias económicas e sociais da guerra de Ucraína. A inmensa maioría das titulares de explotacións galegas que historicamente non teñen axudas da Política Agraria Comunitaria (PAC), como por exemplo as persoas que se dedican ao viñedo ou á horta, quedarían xa excluídas. Por outra parte quedarían fóra os pastos temporais e os permanentes, que son a base fundamental das explotacións gandeiras. Tendo en conta todas estas exclusións e o feito de que o importe para outro tipo de aproveitamentos de secaño sería de 22 euros por hectárea, e non se aprobarían contías inferiores a 200 euros, temos novamente unha axuda convocada no papel que non vai chegar á maioría das granxas galegas. Malia as demandas da sociedade dunha alimentación máis saudable e producións coidadosas co medio ambiente, a Xunta acaba de denegarlles a 637 granxas a axuda de xestión sustentábel de pastos, a 119 granxas de leite as axudas para extensificar a produción e denegoulles, entre outras, a 124 de 150 a axuda para conversión a gandería ecolóxica; a 109 negoulles a axuda de mantemento de gandería ecolóxica, e isto malia que contamos con un escaso 5% de superficie certificada en ecolóxico e a Unión Europea di que deberiamos ter un 25% para o 2030. Tendo en conta que as persoas titulares de proxectos situados fóra da Galiza si van recibir estas axudas, trátase dunha clara discriminación, que se vén sumar ao feito de que non haxa campañas dende a administración pública galega para achegar os alimentos ecolóxicos ás escolas, aos hospitais e demais centros de compra pública, nin para que estean accesibles ás persoas consumidoras. Xestión forestal Todo isto contrasta coas enormes cantidades que a Xunta destina ás medidas forestais e en particular á extinción de incendios. Co 7% da superficie forestal, en Galiza temos nalgúns períodos arredor do 50% dos lumes, e iso que a Xunta destina sobre 180 millóns de euros anuais ao Plan de prevención e defensa contra os incendios forestais. Esta mesma semana o conselleiro do Medio Rural publicitaba a compra de 28 novos vehículos para incendios. O mellor xeito de evitar incendios forestais é contar cunha paisaxe mosaico, na que a actividade agraria e gandeira contribúa a un control sostible da biomasa, reforzando a prevención para non ter que apagar lumes, que implican graves danos ecosistémicos, perdas materiais e mesmo o perigo para vidas humanas. Para solucionar, por exemplo, o problema do 50% das granxas que quedaron fóra das axudas de ecolóxico por falta de orzamento precisaríanse uns 2,5 millóns, que suporían cantidades moito máis baixas que as empregadas para os medios aéreos ou os servizos de extinción. A maioría das vacas que están nos pastos son auténticas obreiras cortalumes, fundamentais para manter a contorna de moitas vivendas con cantidades de biomasa controlada, o que resulta básico nun medio que se caracteriza pola súa gran dispersión xeográfica. Estes pequenos proxectos son esenciais para a xestión do medio pero tamén como complemento de rendas para moitas persoas e familias, moitas mulleres, xerando unha dinamización económica encadeada en ámbitos nos que non hai moitas alternativas. Dun total de 27.400 granxas galegas con vacas, 11.700 teñen menos de 10 cabezas, 6.900 entre 10 e 29, e arredor de 8.800 contarían con máis de 30 Desprezando a importancia económica e social destes miles de proxectos, a Consellería do Medio Rural na xestión de axudas pola Covid optou por deixar fóra das de menor dimensión, que son a maioría. O Sindicato Labrego Galego recorreu as denegacións nos tribunais polo seu carácter discriminatorio, conseguindo finalmente que se recoñecese o dereito ás axudas inicialmente denegadas. Hai que ter en conta que, dun total de 27.400 granxas con vacas, 11.700 teñen menos de 10 cabezas, 6.900 entre 10 e 29, e arredor de 8.800 contarían con máis de 30. Relevo xeracional O relevo xeracional no agro galego é outro dos grandes retos, posto que o 72% das persoas titulares de proxectos agrarios e gandeiros galegos teñen actualmente máis de 55 anos e o 48% xa contan con máis de 65. Aínda así, a convocatoria para este ano de axudas estratéxicas para este fin, como as destinadas á incorporación das persoas mozas, saíu sen que a Xunta nin sequera contestase os expedientes tramitados o ano pasado. Non hai ningún país cunha soberanía real se o seu territorio está hipotecado ou é totalmente dependente en cuestións básicas como a alimentación.