Até 50 entidades bancarias máis dos Estados Unidos están en risco de colapso financeiro

Até 50 bancos máis dos Estados Unidos de América (EUA) poderían declararse en quebra antes de que as autoridades resolvan os problemas financeiros estruturais, sinalou esta cuarta feira a RIA Novosti Lawrence McDonald, o antigo vicepresidente do banco Lehman Brothers, cuxo colapso foi un dos principais acontecementos que desembocaron na crise financeira global de 2008. A creba de dous grandes bancos dos EUA causa "pánico" nos mercados globais De acordo con McDonald, a crise bancaria actual nos EUA é similar ao colapso do propio Lehman Brothers. O ex directivo prognosticou que os bancos de ámbito rexional perderán "centos de miles de millóns de dólares" que recibirán bancos maiores, despois do cal serán investidos en bonos do Tesouro. Ademais, McDonald opinou que Washington verase obrigado a introducir unha retención de fondos en depósitos bancarios superiores á contía de 250.000 dólares, así como a estabelecer ferramentas para aumentar as garantías financeiras sobre os propios depósitos bancarios. As turbulencias financeiras nos EUA comezaron a principios deste mes de marzo coas quebras de Silvergate Capital Corp. e Silicon Valley Bank (o segundo maior colapso bancario na historia dos EUA). Posteriormente quebrou Signature Bank, do que a Corporación Federal de Seguros de Depósitos dos EUA aprobou a venda de parte dos activos. Actualmente, o segundo maior banco de Suíza, o Credit Suisse, tamén experimenta importantes problemas, até o punto de que tivo que ser adquirido polo seu competidor directo, a maior entidade financeira deste Estado, UBS, sendo intermediario desta operación o Executivo suízo. A cadea de colapsos semella non ter rematado, pois segundo reporta Reuters, unha nova entidade estadounidense, o First Republic Bank, tamén está en risco de quebra. Trátase dun banco aproximadamente do mesmo tamaño que o recentemente colapsado Silicon Valley Bank. Os apuros desta entidade para conseguir unha inxección de capital causan preocupación polo sector bancario en xeral e centraron as conversas da reunión da Fed (a Reserva Federal dos EUA) desta cuarta feira, na que se estudaron medidas para reforzar a estabilidade financeira. First Republic Bank non é o único banco do que se coñeceron problemas nas últimas horas, xa que a entidade financeira PacWest Bancorp caeu esta cuarta feira 10% na bolsa de Wall Street tras informar da saída duns 6.800 millóns de dólares en depósitos desde finais de decembro. Expectación ante a Fed A Fed culminou esta cuarta feira o conclave monetario iniciado na xornada previa cunha decisión sobre os tipos de xuro envolta dunha forte incerteza e expectación. Finalmente, o banco central decidiu aprobar unha suba dos tipos de xuro nos EUA de 0,5%, até situalos nun rango obxectivo de entre 4,75% e 5%. Credit Suisse afunde en bolsa e reaviva o temor no sector bancario tras a creba de Signature e SVB Ademais, o banco central dos EUA asegurou que "pode ser apropiado certo endurecemento adicional da política monetaria". Porén, a Reserva Federal dos EUA sinalou que "está preparada" para "axustar" a súa política se "emerxen riscos que impidan a consecución dos obxectivos", en referencia ao control da escalada inflacionista actual. A Fed asegurou que "o sistema bancario estadounidense é sólido e resistente". O presidente da institución, Jerome Powell, considerou "probábel que os acontecementos recentes resulten en condicións crediticias máis estritas para os fogares e as empresas e teñan efecto sobre a actividade económica, a contratación e a inflación". "O alcance destes efectos é incerto. O Comité segue moi atento os riscos de inflación", agregou. "Estamos preparados para usar todas as nosas ferramentas, se son necesarias, para manter o sector bancario sólido e resistente", remarcou Powell. Todas as olladas, tamén desde a Unión Europea (UE), estaban fixadas esta cuarta feira nas accións que fose tomar a Reserva Federal dos EUA, despois de que a recente crise bancaria iniciada na última semana acendese as alarmas sobre un posíbel endurecemento excesivo das condicións de financiamento. Os xefes de Estado e de Goberno da UE reúnense esta quinta feira e esta sexta feira en Bruxelas Neste sentido, as turbulencias financeiras e a venda de Credit Suisse ao banco UBS marcarán o debate na reunión de xefes de Estado e de Goberno da UE que decorrerá nas xornadas de hoxe e de mañá en Bruxelas (o primeiro encontro de líderes da UE tras a quebra do Silicon Valley Bank), na que as autoridades comunitarias aproveitarán para abordar a necesidade de finalizar a unión bancaria e a unión de mercados de capital. Alemaña confía en manter a estabilidade financeira Neste contexto, o Consello de Expertos Económicos do Goberno de Alemaña, coñecido como os 'sabios', revisou á alza as súas expectativas de crecemento, mentres que anticipou que a inflación seguirá elevada tras tocar teito en 2022 e que esperan que as recentes tensións nos mercados non suporán unha ameaza para a estabilidade financeira. Da crise financeira e a importancia dun sistema bancario propio "Con todo, o alto nivel de incerteza nos mercados financeiros nas últimas semanas dificultou que os bancos centrais contrarresten a inflación", apuntou Ulrike Malmendier, unha das conselleiras deste organismo. O Consello "non ve en risco a estabilidade financeira" e subliñou que, a diferenza da crise financeira mundial de 2008, os problemas de bancos individuais non reflicten produtos financeiros sen valor, destacando que o mercado interbancario e a oferta de crédito á economía atópanse actualmente intactos. Luis Alberto Otero: "Algo fallou na supervisión financeira dos EUA" O catedrático de Economía Financeira e Contabilidade da Universidade de Santiago de Compostela (USC), Luis Alberto Otero, analizou en exclusiva para Nós Diario a actual crise bancaria. "O risco principal que se produce agora mesmo para os bancos é a suba repentina dos tipos de xuro e o impacto sobre as carreiras que teñen investidas en bonos”explica o experto. "O risco principal é a suba dos tipos de xuro", explica o profesor otero "Outro problema pode xurdir pola parte da liquidez. No caso de que os bancos non paguen ben polos depósitos e o Estado ofreza produtos en mellores condicións, os investidores poden sacar os cartos dun sitio para metelos no outro e os bancos terán que subir xuros ou facer fronte a retirada de depósitos ", sinala. Porén, afirma, "os colchóns de liquidez cos que estamos vendo que está cuberto o sector bancario da Unión Europea (UE) son moi potentes". Un terceiro risco, sinala, é o efecto dominó, "que as quebras duns bancos rematen invadindo outros". "Algo fallou no caso dos Estados Unidos de América (EUA), o risco bancario non só está revisado senón tamén regulado", explica o catedrático da USC. "Curiosamente o Silicon Valley Bank fora sometido a unha auditoría", agrega. Con todo, "pode ser que o banco estivera cuberto parcialmente contra unha suba de tipos de xuro de determinada envergadura mais que un cambio tan repentino na política monetaria xunto á retirada de depósitos rematara con el". "O normal é que os bancos non asuman un risco tan claro investindo tanto a longo prazo a xuros baixos pensando que iso nunca vai cambiar", explica. "As entidades teñen paquetes de bonos do Estado, mais deben estar cubertas por recursos suficientes dos bancos, e creo que os da UE, que teñen unha supervisión máis estrita, non deberían caer", culmina o profesor.