Os alimentos lideraron a suba de prezos nos últimos 12 meses ao encarecer 15,6%

O Índice de Prezos de Consumo (IPC) experimentou na Galiza unha suba de 6,4% entre xaneiro de 2022 e xaneiro de 2023, superando en medio punto porcentual o índice do Estado español, de 5,9%. O maior encarecemento deuse nos alimentos e bebidas non alcólicas, de 15,6%, superior ao da media do Estado, de 15,4%. A inflación na Galiza fica en xaneiro por riba da estatal O custo das bebidas alcólicas e do tabaco é o segundo apartado que máis subiu de prezo na Galiza, en 9%, mentres que a nivel estatal este encarecemento foi de 8,2%. A continuación, os restaurantes e hoteis aumentaron o seu custo en 8,5% (7,8% a nivel estatal). Os móbeis, artigos do fogar e artigos para o mantemento corrente do fogar encareceron 8,2% (7,9% no Estado), e o transporte subiu de custo en 6,9% (5,6% a nivel estatal). Así, todas as principais subas do IPC de produtos entre xaneiro de 2022 e xaneiro de 2023 foron maiores na Galiza do que a nivel estatal. Pola súa parte, a principal baixada de prezo, de 8,4%, deuse en vivenda, auga, electricidade, gas e outros combustíbeis, mesma taxa que no conxunto do Estado español. Alén deste, o único apartado no que baixou o IPC interanual, en 0,9%, foi no ensino, mentres que no Estado encareceu 1,5%. O incremento interanual do IPC experimentado na Galiza deuse a pesar dunha caída da inflación en termos mensuais, pois os prezos minguaron en 0,3% con respecto ao mes de decembro, mentres que esta baixada no conxunto do Estado foi de 0,2%. Porén, o custo dos alimentos e as bebidas non alcólicas si subiu en xaneiro con respecto ao mes anterior, en 0,2% na Galiza e en 0,4% a nivel estatal. En termos mensuais, as maiores subas do IPC na Galiza corresponderon coas comunicacións (4,5%) e o transporte (4,4%), mentres que as bebidas alcólicas e o tabaco encareceron 1,4%. A maior baixada, coincidindo co período de rebaixas de xaneiro, deuse no apartado da roupa e o calzado, de 12,1%. O azucre e os produtos lácteos dispáranse O Instituto Nacional de Estatística (INE) non achega datos desagregados por produtos para a Galiza. Porén, tendo en conta os datos a nivel estatal, o azucre foi o produto que máis viu disparado o prezo en termos interanuais, pois encareceu 52,1% (1,1% con respecto a decembro). A eliminación da bonificación aplicada aos carburantes provoca unha suba dos prezos Pola súa parte, a manteiga subiu de prezo 38,2% en 12 meses (1,8% mensual), o leite enteiro 33,4% (-1,5% mensual) e o desnatado 32,9% (-1,5% con respecto a decembro). Os iogures encareceron 26,7% (2,8% nun mes), o queixo 20,5% (-0,7% con respecto a decembro), mentres que outros produtos lácteos subiron de prezo en 27,6% (4,8% con respecto ao mes anterior). O aceite de oliva é hoxe 30,5% máis caro do que era hai 12 meses Destaca tamén a suba interanual do prezo do aceite de oliva, de 30,5% (-1,2% en termos mensuais) e a doutros aceites comestíbeis, de 32,1% (-6,1% con respecto a decembro). Entre as subas máis altas do IPC entre xaneiro de 2022 e xaneiro de 2023 tamén se atopa a das fariñas e outros cereais, de 28,1% (-2,3% con respecto a decembro), a dos ovos, de 27,2% (-1,5% en termos mensuais), a do arroz, de 19,6% (3,7% nun mes), e a das patacas, de 18,9% (-1% con respecto a decembro). Suba da carne e do peixe Entre as carnes, destaca a suba interanual da aviar, de 14,4% (-0,2% con respecto a decembro), da porcina, de 14,3% (0,4% mensual), e da vacún, de 13,7% (0,6% nun mes). Menos intensa foi a suba da carne de ovino e caprino, de 8,2% (-3% respecto do mes anterior). O peixe tamén experimentou unha suba de prezo en termos interanuais, de 7,7% no caso do fresco e refrixerado (4,7% mensual) e de 13,6% no caso do conxelado (0,4% nun mes). Pola súa parte, o marisco fresco ou refrixerado encareceu 7,3% en termos interanuais (0,1% con respecto a decembro) e o conxelado 6,4% (1% mensual). O pan subiu de prezo 13,5% en 12 meses (-0,2% nun mes), mentres que outros produtos de panadaría incrementaron 28,2% o seu custo (1,3% con respecto a decembro). Ademais, a pizza e o quiche encareceron 20,6% (5,1% en termos mensuais), as salsas e condimentos subiron de prezo en 33,9% (1,7% nun mes), e os alimentos para bebés aumentaron o seu custo 16,4% (1,3% con respecto a decembro). Inflación subxacente Tamén con datos a nivel estatal, a inflación interanual subxacente —sen alimentos non elaborados nin produtos enerxéticos— fechou xaneiro en 7,5%, unha taxa cinco décimas porcentuais superior á do mes anterior e a máis alta desde decembro de 1986. Con este dato, a subxacente supera o IPC xeral en máis de 1,5 puntos. Porén, en termos mensuais, a inflación subxacente descendeu en 0,2%. A inflación subxacente alcanzou o récord desde o ano 1986 A inflación subxacente serve aos Estados para coñecer cal é a evolución dos prezos con independencia dos eventos conxunturais ou transitorios, moitas veces externos, e, dese modo, implementar e medir con maior rapidez os resultados das súas políticas económicas internas. A inflación subxacente dispárase até un 7,5% de récord Por outra parte, esta taxa tamén ten unha importancia normativa, unha vez que o Executivo do Estado español condicionou a continuación da rebaixa do Imposto sobre o Valor Engadido (IVE) sobre determinados alimentos á evolución deste índice. Desta forma, a rebaixa do IVE estará vixente até o próximo 30 de xuño de 2023, a condición de que a inflación subxacente non baixe de 5,5%. No caso de descender desa cifra, o Goberno español revertería a medida case dous meses antes do previsto, ao arrincar maio. O BCE responderá con subas dos tipos de xuro A taxa de inflación da zona euro moderouse en xaneiro a 8,5%. Ante esta taxa, o Consello de Goberno do Banco Central Europeo (BCE) decidiu elevar 0,5% os tipos de xuro e anticipou outra probábel suba de igual magnitude na súa reunión de marzo. A pesar das consecuencias sociais e da pouca eficacia das medidas do BCE para reducir a inflación, o vicepresidente da institución, Luis de Guindos, insistiu a pasada semana na posibilidade de novas subas dos tipos de xuro. Ademais, o economista cuestionou a suba de salarios a pesar do incremento do custo da vida que están a sufrir as clases populares. "Debe evitarse unha espiral de salarios e prezos", afirmou de Guindos. Sobe o prezo dos produtos de papel Unha das maiores subas na taxa do IPC interanual foi a experimentada polos produtos de papel, que encareceron 29,6% entre xaneiro de 2022 e xaneiro de 2023. Unha suba que non foi repercutida pola empresas editoras de xornais diarios, que a pesar do importante aumento dos seus custos que supón este encarecemento -así como a suba doutros apartados da produción de xornais-, tan só incrementaron o prezo do seu produto en 4,1% en 12 meses.