Os alimentos encarecen 16,6% no último ano, a maior repunta desde 2002

O Índice de Prezos ao Consumo (IPC) subiu 0,8% en febreiro na Galiza en relación co mes anterior e describiu unha taxa interanual de 6,4%, catro décimas máis que a media do Estado español (6%), segundo os datos definitivos publicados esta terza feira polo Instituto Nacional de Estatística (INE). Os alimentos e bebidas non alcohólicas aumentaron o seu prezo 16,6% nos últimos 12 meses, mentres que as bebidas alcohólicas e o tabaco encareceron 7,8%. Trátase do maior encarecemento da alimentación desde que existen rexistros na base de datos do departamento de Estatística (2002). Os alimentos encareceron 1,6% entre xaneiro e febreiro deste ano, a pesar da rebaixa do Imposto sobre o Valor Engadido (IVE) que o Goberno do Estado aplicou en determinados produtos do cesto da compra. Tamén o prezo da roupa e do calzado incrementou 2,6%, mentres que no caso dos utensilios do fogar, o aumento foi de 7,7%. A medicina (+1,7%), o transporte (+3,2%), as comunicacións (+2,5%), o ocio e a cultura (+3,6%) e os hoteis, cafés e restaurantes (+8%) tamén incrementaron o seu prezo. Pola súa parte, os produtos de ensino diminuíron 0,9%, polo que son máis baratos hoxe que con respecto ao mesmo mes de 2022. Vivenda, auga e electricidade subiron dous puntos neste mes, mais o seu prezo mantense 6,3% por baixo na comparativa interanual. Non obstante, a caída deste último indicador está condicionada polo contexto de escalada inflacionista do pasado ano. En marzo de 2022 o indicador de vivenda, auga e electricidade chegou a rexistrar unha inflación anual de 38,9%. Dispáranse os prezos dos alimentos Segundo o INE, os prezos dos alimentos medraron en febreiro 16,6% en taxa interanual, máis dun punto por riba da do mes anterior. Neste comportamento influíu o encarecemento de legumes e hortalizas, que soben 23,6%, e da carne, cun aumento de 17,3%. Tamén influíu que peixe e marisco baixaran os seus prezos menos que o ano pasado. De feito, estes indicadores aumentaron nos últimos 12 meses 9,4% e 7,4%, respectivamente, ficando ademais excluídos da rebaixa do IVE aplicada polo Goberno do Estado a pesar das protestas da cadea de produción mar-industria. O Ministerio de Asuntos Económicos do Estado español destacou que en febreiro encareceron sobre todo os alimentos frescos. "Legumes e hortalizas, e tamén froitas frescas, experimentaron unha redución puntual da oferta como consecuencia dunhas condicións climáticas desfavorábeis, en España e noutros Estados comunitarios, que provocou un incremento de prezos polo aumento da demanda internacional", apuntou. A eliminación da bonificación aplicada aos carburantes provoca unha suba dos prezos O azucre lidera a suba do prezo do cesto da compra, cun aumento de 52,6% nos últimos 12 meses, segundo datos estatais publicados esta terza feira polo INE. A manteiga (+39,1%), as salsas e condimentos (+33,8%) e o aceite de oliva (+33,5%) sitúanse tamén na parte de arriba da táboa, seguidos do leite enteiro e desnatado, que soben 33,2% 33,1% respectivamente. Outros produtos básicos do cesto da compra tamén incrementaron o seu prezo: os ovos (+28%), as fariñas e outros cereais (+26,2%), os iogures (+21,4%), o arroz (+21,2%) ou as patacas (21%). A nivel estatal, o IPC subiu 0,9% en febreiro en relación ao mes anterior e elevou unha décima a súa taxa interanual, até o 6% polo encarecemento da electricidade, dos paquetes turísticos e dos alimentos, segundo datos do departamento de Estatística. A inflación interanual definitiva de febreiro é unha décima inferior á avanzada a finais do mes pasado, cando o INE apuntou unha taxa de 6,1% mentres que a suba mensual finalmente foi de nove décimas, fronte ao aumento de 1% estimado inicialmente por Estatística. Coa suba rexistrada neste segundo mes de 2023, a inflación encadea dous meses consecutivos de ascensos na súa taxa interanual após a repunta de xaneiro, cando se incrementou dúas décimas, até 5,9%. Inflación subxacente Pola súa parte, a inflación subxacente (que exclúe alimentos non elaborados nin produtos enerxéticos e que marca a tendencia no crecemento dos prezos dos bens e servizos que consumimos) aumentou unha décima en febreiro, até 7,6%, a súa taxa máis alta desde decembro de 1986. Con este dato, inferior nunha décima ao estimado inicialmente polo INE, a inflación subxacente supera o índice xeral en máis de 1,5 puntos. A inflación subxacente repunta até os seus valores máximos en 40 anos Mercadona di que subiu os prezos "unha burrada" O mesmo real decreto lei que estabelecía a rebaixa no IVE prohibía aplicar subas nas marxes de beneficio empresarial e, non obstante, 20% dos alimentos afectados pola rebaixa subiron o seu prezo en febreiro unha media de 10%. En relación coa marxe de beneficio das empresas distribuidoras, o presidente de Mercadona, Juan Roig, recoñeceu esta terza feira que os prezos de venda na cadea de supermercados que dirixe subiron "unha burrada", pero asegurou que a compañía "deixou a pel" para repercutir menos custes aos seus consumidores. Os prezos da alimentación nos supermercados aumentaron 30% no último ano Así o indicou na rolda de prensa anual para informar sobre a situación de Mercadona, onde anunciou beneficios de 718 millóns de euros en 2022. "Ter beneficios é unha cousa moi boa, en España parece que o teñamos que ocultar", lamentou. Roig insistiu en que "un empresario é un amigo de España", polo que deben ser beneficiados "ao máximo". Roig remarcou que empresarios e directivos serven para "xerar riqueza e o benestar dunha sociedade dependerá do número de empresarios que exista". "Se queremos crear riqueza a única maneira é pondo un caldo de cultivo bo aos empresarios, velos como un amigo", sostivo. Poder adquisitivo Un informe publicado esta terza feira por Adecco afirma que o poder de compra do salario medio da Galiza baixou o equivalente a 637 euros en dous anos. Ao mesmo tempo, o poder adquisitivo da remuneración media de Madrid foi equivalente a 180 euros máis ao ano que o poder adquisitivo galego.