martes 28.01.2020

Alcoa fecha 2019 con máis de mil millóns de euros de perdas

A multinacional Alcoa, propietaria da planta de Cervo, acusa nas súas contas o seu plan de reestruturación no que non está claro o futuro da factoría galega.
Traballadores diante da planta da multinacional Alcoa en Cervo (Europa Press).
Traballadores diante da planta da multinacional Alcoa en Cervo (Europa Press).

Malas novas para Alcoa, desta vez en forma de resultados. O grupo estadounidense vén de adiantar as cifras do exercicio 2019, no que a compañía rexistrou unas perdas superiores aos mil millóns de euros (1.125 millóns de dólares), que contrastan con 224 millóns de euros de beneficio que declarou o exercicio anterior. 

Os custos de reestruturación lastran as contas da multinacional de Pittsburgh, cun impacto negativo de 924 millóns de euros. Os ingresos no exercicio descenderon 22%, até os 10.433 millóns de euros como consecuencia dos menores prezos do aluminio. Con todo, para o presente curso, a compañía prevé mellorar as cifras grazas a un incremento entre 1,4% e 2,4% da demanda de aluminio.

Tamén, para atallar os números vermellos, Alcoa anunciou en outubro unha revisión dos seus activos, incluíndo a venda dos no estratéxicos, así como avaliar as súas capacidades de produción. Esta mesma semana, o presidente da multinacional no Estado español visitou a planta galega de Cervo, onde anunciou unhas perdas de 80 millóns de euros en 2020. O emprego e a continuidade da factoría dependen de abaratar a factura eléctrica, para o que será clave a aprobación do estatuto das electrointensivas.

De Cervo a Madrid

O vindeiro 22 de xaneiro, o comité de empresa da planta de San Cibrao (Cervo) ten previsto levar as súas reivindicacións até o Ministerio de Transición Ecolóxica e ao Congreso dos Deputados para que,"dunha vez por todas se poña en marcha o marco estatutario para dar unha saída ás empresas electrointensivas e á industria deste país", sinalou o seu presidente, José Antonio Zan.

O presidente do comité lamentou a "decepción" de non contar co estatuto electrointensivo tras o primeiro Consello de Ministras, aínda que confía en que "saia cuanto antes, e se é bo terá valido a pena a espera".

comentarios