mércores 15.07.2020

Alcoa San Cibrao: feche da planta de Aluminio e 500 despidos

A empresa avalía despedir case á metade do seu cadro de persoal no complexo de San Cibrao e fechar a planta de aluminio. O presidente da multinacional no Estado español, Álvaro Dorado, reúnese hoxe co comité de empresa. 

Vista da factoría de Alcoa en San Cibrao (Europa Press)
Vista da factoría de Alcoa en San Cibrao (Europa Press)

Alcoa vai despedir 500 traballadores e traballadoras da súa planta de San Cibrao, case a metade do seu cadro de persoal neste complexo industrial. É a noticia que a última hora desta cuarta feira avanzou a Cadena Ser e que segundo este medio a dirección notificará hoxe ao comité de empresa. Hai fixada unha reunión para as 12:30 horas.

A decisión é un golpe mortal para a factoría de aluminio - que se vería abocada ao feche da planta de aluminio pendente do futuro da outra parte do persoal - e para a economía da comarca, onde supón un motor económico innegábel. Estamos a falar de 1.100 postos de traballo directos e outros tantos indirectos e xera unha terza parte do PIB da provincia de Lugo. A medida non afectaría en principio á planta de alúmina (300 empregos).

O elevado prezo da enerxía (que supón máis de 40% dos custos de produción da factoría) e a sobreprodución mundial de alumninio nun mercado paralizado polo coronavirus serían os motivos que a empresa argumenta para adoptar estas medidas.

A decisión é "a morte desta comarca", afirma o alcalde de Cervo, Alfonso Villares

A decisión era o que se temían desde hai tempo na Mariña. A xuntanza prodúcese tan só unhas semanas despois de que a multinacional anunciase que non ía reparar as cubas da fundición unha vez que estas chegaran á fin da súa vida útil, unha decisión que tivo un impacto inmediato na industria auxiliar da comarca.

Ao longo destas semanas, os traballadores amosáronse preocupados polo futuro da factoría e pola incidencia que esas medidas que está a barallar a empresa poidan ter no emprego e na actividade da planta. Tamén lembraban que seguen "sen resposta" do Ministerio de Industria ás solicitudes que lle trasladaron para convocar a mesa multifuncional de Alcoa San Cibrao. 

Alcoa comprou á Sociedade estatal de participacións industriais (Sepi) en 1998 varias plantas, entre elas as 2 galegas, pagando menos de 400 millóns de euros. Hai máis de 20 anos. Desde 1998 a 2011 a compañía gañou perto de 1.500 millóns de euros. E recibiu nunha década máis de 1.000 millóns de euros en axudas públicas.

Tarifa xusta

Durante estes meses sindicatos como a CIG protaonizaron unha campaña na que demandaban un marco tarifario estábel para un sector electrointensivo “en crise” en Galiza

comentarios