luns 01.06.2020

Os aeroportos galegos perden en marzo 60% da pasaxe

Nos aeroportos de Alvedro e Peinador os voos só operan baixo demanda.
Interior da terminal do aeroporto Rosalía de Castro de Compostela (AENA)
Interior da terminal do aeroporto Rosalía de Castro de Compostela (AENA)

Os aeroportos galegos, como era de esperar, rexistraron o peor mes de marzo en décadas no que a tráfico de viaxeiros se refire. Polas terminais de Alvedro, Peinador e Lavacolla, rebautizada como Rosalía de Castro, pasaron 151.220 persoas o pasado mes, o que representa un descenso superior a 60% respecto ao mesmo período do ano anterior, segundo os datos facilitados onte polo xestor aeroportuario Aena.

No caso do aeroporto compostelán, o de maior tráfico da Galiza, a caída rexistrada en marzo foi de 63,2%, cun total de 77.934 viaxeiras transportadas. Peor parado saíu o de Vigo, con 66% de baixada e só 28.811 pasaxeiros. Por último, pola terminal coruñesa de Alvedro pasaron en marzo 44.475 persoas o que supón 59,1% menos que no mesmo mes de 2019.

Os malos datos de marzo cortan a tendencia á alza que estaban a experimentar os aeroportos de Alvedro e Rosalía de Castro, non así o de Peinador, que desde o plante de Ryanair ao Concello de Vigo sumaba varios meses en negativo.

A caída de marzo tamén tingue de vermello as cifras do acumulado do ano, que apuntaban un novo récord histórico tanto no Rosalía de Castro como en Alvedro. Após a caída de tráfico do pasado mes, a terminal compostelá queda con 433.057 usuarias no primeiro trimestre do ano, 22% menos que nos tres primeiros meses de 2019. No caso do aeródromo coruñés, o descenso é de 12,6%, xa que pasaron polas súas instalacións 254.231 pasaxeiras. En Peinador, a caída é moito máis acusada, de 30,4%, só superada na rede de aeroportos de Aena polo de Xerez (35,7%). Entre xaneiro e marzo atravesaron a terminal viguesa un total de 158.691 persoas.

Baixo demanda

As cifras de Alvedro e Peinador poden empeorar no mes de abril, xa que o xestor aeroportuario Aena decidiu limitar a operatividade en ambas as terminais, deixando a competencia de voos que non sexan esenciais en función de se hai demanda ou non. Esta decisión supón, na práctica, o feche destes aeroportos, o que deixa ao aeroporto Rosalía de Castro como o único plenamente operativo da Galiza. Aínda así, a situación tardará en normalizarse e será difícil para as tres terminais, especialmente para Vigo, rematar o ano en positivo.

comentarios