Concurso de acreedores nunha empresa da familia Cuiña que percibiu case 2,5 millóns de euros en axudas

Construcciones Técnicas de Radioterapia, da que Rafa Cuiña era conselleiro, entrou en fase de liquidación tras ter recibido máis de dous millóns de euros en subvencións a fondo perdido e créditos brandos
Rafa Cuiña e Feijóo
photo_camera Rafa Cuiña e Feijóo

Construcciones Técnicas de Radioterapia (CT-RAD), "firma de corte tecnolóxico e innovador, e exemplo de visión de futuro", Así definía en 2009 a esta empresa, recén adquirida polo grupo Aurela, da familia Cuiña, un xornal galego. A firma era unha das grandes apostas de Aurela, a xoia dun emporio que naquel exercicio representaba 70 millóns de euros. 

A familia Cuiña vén de liquidar CT-RAD, empresa que ten recibido perto de dous millóns e medio de euros en axudas públicas, ben a través de subvencións a fondo perdido ou ben mediante créditos brandos. Aurela presentou concurso voluntario de acreedores e o Xulgado do Mercantil número 2 da Coruña vén de adoptar a súa primeira decisión: Liquidar CT-RAD, o que supón liquidar a empresa e cesar ao seu consello de administración (do que formaba parte Rafael Cuíña). O consello pasa ser substituido por administradores concursais. Ao liquidar Construcciones, a familia Cuíña renuncia a facer fronte a un plan de viabildiade para o futuro da firma.

CT-RAD presentouse nas Pontes en 2009 como unha das grandes apostas do grupo Aurela. O Ministerio de Industria, o de Economía e o Igape concederon pola volta de 1,2 millóns de euros en axudas a fondo perdido a esta empresa. Non foi a única. Ao abeiro do Plan Ferrol, tamén se beneficiou doutros 1,2 millóns de euros en empréstitos a interese cero.

Igape

Xesgalicia, organismo de investimento ligado ao Igape, foi socio desta empresa dos Cuiña mediante o fondo Emprende, cunha participación do 20% no accionariado.

Comentarios