O Consello Xeral da Arquitectura Técnica de España (CGATE, nas siglas en español) sinalou nesta segunda feira, 30 de marzo, que en Galiza só se paralizaran arredor de 20% das obras pola crise sanitaria da COVID-19 antes do decreto estatal que ordena o feche de todas as actividades non esenciais, como a construción de forma xeral.
Os datos forman parte dunha enquisa efectuada pola consultora GAD3 entre os profesionais da construción e que, a nivel estatal, sinala que só 34% das obras se paralizaran durante a crise.
En Galiza, polo tanto, 80% das obras permanecían en funcionamento até a entrada en vigor do decreto, nesta segunda feira. Por riba estaban Euskadi, con 87%; Cantabria, con 97%, e Nafarroa, onde non parou ningunha obra. En Madrid, epicentro da pandemia, mantíñanse 56%.
O informe do CGATE explica ademais que só 11% das destas obras activas a nivel estatal teñen un carácter urxente ou interese xeral.
