Galiza acabou 2013 con máis persoas no paro que 2012. A variación é estatisticamente pouco significativa, menos de mil persoas (arredor de 400, a propria EPA advirte que para menos de 5.000 persoas a mostra está suxeita a erros). No Estado, a tendencia é distinta: o paro diminuíu en 69.000 persoas.
En Galiza hai 92.800 fogares con todos os seus membros activos no paro. Son 3.600 fogares máis que no trimestre anterior
O paro incrementou en Galiza en taxa inter-anual nun 0,16 por cento, mentres que nas outras nacións sen Estado -Catalunya e Euskadi- as cousas foron sensibelmente mellores, nomeadamente no caso catalán, cun descenso moi significativo do 7,31%, mentres que a economía basca se anotou unha redución do desemprego do 2,72%. En ambos casos, o comportamento do desemprego foi moito mellor do que en España (a queda española do paro foi do 1,16%.
A taxa de paro galega fica no 21,96%, abondo por debaixo da española, 26,03%. A explicación é que na Galiza a taxa de actividade [que mide cantas persoas traballan en relación á poboación en idade de traballar] é sensibelmente inferior á estatal: 54,32% face 59,43%. Ou sexa, empregamos moita menos persoas do que España e, ao ser a nosa poboación activa menor, resulta máis doado que o sexa tamén a taxa de paro. A EPA tampouco recolle, loxicamente, os miles de galegos e galegas que abandonaron o País rumo á emigración.
Queda de activos
A estatística de traballador@s activ@s non deixa lugar a dúbidas. Galiza perde máis activ@s [persoas que traballan ou están no paro na procura de emprego, isto é, persoas que están no mercado laboral] do que España. Fechouse 2013 cunha caída do 2,93% no número de activ@s galeg@s, face a queda do 1,17% estatal.
Dos 277,8 miles de parad@s galeg@s 184,6 son homes e 129,2 son mulleres. A taxa de actividade entre os homes é claramente superior á das mulleres: 60,02% face o 49,14%, o cal indica que as políticas neoliberais en curso están a expulsar a moitas mulleres -que soportan piores condicións de traballo e salarios máis baixos- do mercado laboral.
Fogares
Na Galiza había, a finais de 2013, un total de 92.800 fogares con todos os seus membros activos en paro. Son 3.600 foagres máis que no trimestre anterior. Un dado que indica o forte impacto social do desemprego no noso país.
