13 sociedades do grupo Inditex teñen o seu enderezo fiscal nos Países Baixos

Inditex conta con 13 sociedades nos Países Baixos pero só unha delas, ITX Nederland BV, ten como actividade a venda ao público. Neste caso, a mercantil controla as marcas coas que opera nese Estado, que en 2021 a alianza Tax Justice Network colocou entre os 10 primeiros paraísos fiscais do mundo. As restantes 12 sociedades de Inditex nos Países Baixos son mercantís de carteira ou financeira. Así, entre as primeiras atópanse ITW Taiwan, Zara Holding II, Zara México, Zara Holding e Zara Management, destacando, entre as segundas, ITX Financien, ITX Financien III, ITX Tryfin e ITX Rubfin. Asemade, conta coa sociedade inmobiliaria Zara Vastgoed, a empresa dedicada á prestación de servizos ITX Merken e Lelystad Platform, a través da cal controla a súa única plataforma loxística fóra do Estado. Folga en Inditex: "O acordo sindical permite fechar tendas non por perdas, senón para obter máis beneficios á conta das traballadoras" As relacións entre a compañía de Amancio Ortega e Holanda non son novas. A este respecto, en 2016, o grupo parlamentario de ALE/Os Verdes na Eurocámara fixo público un informe titulado Compra de impostos: explorando o negocio de Zara para eludir impostos, onde sinalaba que a operativa mercantil permitiu ao grupo Inditex eludir nos exercicios contábeis de 2011 a 2014 o pago de 218 millóns no Estado español, 76 millóns en Francia, 57 millóns en Italia, 25 millóns en Alemaña, 22 millóns no Reino Unido, 20 millóns en Grecia, 18 millóns en Bélxica e 6 millóns en Austria. O relatorio de ALE/Os Verdes apuntaba que “aquelas filiais de Inditex cos beneficios máis altos, entre o 20% e o 70%, sitúanse en países coñecidos por ter unha lexislación fiscal moi laxa, neste caso Países Baixos, Irlanda e Suíza”. Neste sentido, afirmaba que “semella claro que países como Países Baixos, Irlanda e Suíza ofrecen beneficios fiscais concretos ao grupo Inditex que outros non ofertan”. Asemade, indicaba que “as compañías como Inditex estrutúranse de forma que poidan sacar partido dos tipos impositivos baixos e da falla dun réxime fiscal común na Unión Europea”. Carmen Naveira, presidenta do comité de empresa de Inditex: "Traballar en Inditex con Marta Ortega é máis duro" Os números da compañía non deixan lugar a dúbidas. Así, por exemplo, entre 2011 e 2014 as tres principais mercantís da Inditex en Holanda rexistraron un beneficio neto de 3.000 millóns, 32% do beneficio global do grupo, nun Estado —Países Baixos— onde só conta con 56 tendas das perto de 7.000 abertas en todo o mundo. Inditex concentraba nese período en Holanda o pago dos dereitos de marca, xa que este país grávaos cun imposto de 15%, fronte a 25% do Estado español e 30% da media do conxunto da UE. A investigación de ALE/Os Verdes certifica que “de cada 100 euros de vendas que se realiza en calquera das tendas de Inditex no Estado español, cinco son desviados aos Países Baixos”. Porén, este Estado non é o único territorio considerado paraíso fiscal onde conta con sociedades a multinacional téxtil. Así, dispón de nove compañías en Hong Kong, onde explota os negocios das marcas de Zara, Oysho, Stradivarius, Massimo Dutti e Pull&amp;Bear. Jealsa Inditex non é a única corporación galega con ligazóns nos Países Baixos. Jealsa, o primeiro grupo conserveiro da Galiza, con sede en Boiro, que fechou 2021 cunha facturación de 704 millóns de euros, conta cunha sociedade holding con enderezo nos Países Baixos. Neste caso, trátase da mercantil Sant Yago Holding BV, empregada na operativa coa rede exterior de filiais da compañía. Por que quere vender Inditex todas as súas tendas en Rusia? Zara podería quedar fóra desta operación A presenza dos grandes capitais galegos é doada de seguir nalgúns paraísos fiscais. Así, por exemplo, a segunda fortuna da Galiza e do Estado español, Sandra Ortega, é titular dunha mercantil no paraíso fiscal estadounidense do Estado de Delaware. A sociedade, denominada Nine Thirty Rosp Investments LLC, está ligada á principal investidora da filla maior de Amancio Ortega, Rosp Corunna. Neste caso, a firma foi fundada en 2011 por Rosalía Mera e herdada pola súa filla. Delaware é o enderezo doutras compañías ligadas aos grandes grupos galegos. Entre estas sitúase Textil Lonia Corp, asociada ao segundo grupo téxtil da Galiza, Lonia, titular de firmas de roupa como Carolina Herrera e Purificación García e propiedade dos irmáns de Adolfo Domínguez. No mesmo Estado, aséntanse San José Real Estate Development LLC e 1681 West Avenue LLC, ligadas a Construcciones San José. 4.256 empresas en Madrid Un total de 4.256 empresas con actividade na Galiza tributan na comunidade autónoma de Madrid. Segundo as cifras feitas públicas polo Instituto Galego de Estatística (IGE), relativas a 2021, o último ano con datos dispoñíbeis, 3.551 destas sociedades desenvolven a súa actividade no sector servizos; 364 na industria e na enerxía, dedicándose 264 á industria manufactureira e 51 á xeración eléctrica; 295 á construción, con particular presenza das enxeñarías e empresas de obra civil; 208 á hostalaría; 199 á información e comunicación; 170 ao sector das finanzas e seguros, e 46 á agricultura e á pesca. Inditex incrementou en 41% os seus beneficios no primeiro semestre do ano fiscal As compañías galegas con enderezo fiscal en Madrid adoitan ser aquelas cunha maior facturación e número de traballadoras e traballadores. Neste sentido, 3.510 delas son persoas xurídicas, adoptando a forma de sociedade de responsabilidade limitada 2.385, e de sociedade anónima 1.127. Asemade, 133 declaran entre 100 e 250 traballadoras e traballadores, 61 entre 250 e 500 e 45 máis de 500 empregados e empregadas, o que representa 66,1% do total das empresas galegas nesa faixa de asalariados. 15% do Produto Interior Bruto estatal atópase agochado en paraísos fiscais A presenza dos grandes grupos empresariais e das primeiras fortunas do Estado español nos coñecidos como paraísos e nichos fiscais é moi imporante. Segundo a investigación máis exhaustiva sobre o tema, elaborada polo Nacional Bureau of Economic Research (NBER), en base aos datos achegados polo Banco Internacional de Pagos (BIS) de Basilea (Suíza), en 2017, entre o 30% e o 40% da fortuna do 0,01 máis rico da poboación do Estado español agóchase en paraísos fiscais. Neste sentido, estímase que 15% do Produto Interior Bruto estatal atópase en paraísos fiscais. A crise non afecta Inditex: aumenta os seus beneficios en 80% no primeiro trimestre O Observatorio da Responsabilidade Social Corporativa, fundado en 2004 por entidades como a Cruz Vermella, Oxfam Intermón, CCOO ou Economistas sen Fronteiras, sinala no seu informe sobre 2020, último ano con datos, que 29 das 35 empresas do IBEX teñen sociedades rexistradas en paraísos ou nichos fiscais. Nesta liña, afirma que “29 empresas das 35 analizadas teñen actividade en xurisdicións consideradas como nichos fiscais”. O referido relatorio destaca que “20 das 35 empresas analizadas teñen presenza en paraísos fiscais de acordo co Real Decreto 1080/1991, da lista da Organización para Cooperación e o Desenvolvemento Económico e da lista da Comisión Europea publicada en 2017 e vixente en 2020”. A este respecto, o sinalado informe destaca que Delaware (EUA), con 436 filiais, é o paraíso máis empregado polas fortunas do conxunto do Estado español seguido dos Países Baixos, Irlanda, Luxemburgo, Panamá e Suíza.