Foi unha proba dura, co vento en contra, e a padexeira canguesa non levou medalla por 198 milésimas. Nos últimos metros estivo por un momento en terceira posición, mais, finalmente, o bronce levouno a húngara Natasa Douchev-Janis. A competición de K1 200 metros feminina foi unha carreira trepidante, que gañou a neozelandesa Lisa Carrington. A prata foi para a ucraína Inna Osypenko.
Era a primeira vez que Portela se clasificaba para unha final olímpica na categoría individual. Esta cuarta posición suponlle o seu cuarto diploma, despois de levar dous en Atenas no 2004, nas probas de parellas e de catro de 500 metros, e outro en Pequín hai catro anos, tamén en K4-500.
