A padexeira galega Teresa Portela será candidata ao Premio Princesa de Asturias dos Deportes de 2022, despois de que o Goberno galego anunciase que promoverá a súa figura como expoñente do deporte do noso país.
Portela, que o ano pasado participou nos Xogos Olímpicos de Tokyo, é a deportista galega con maior número de participacións olímpicas, un total de seis, e xa entrena para participar na edición de Paris 2024.
No seu palmarés. a padexeira conta cunha prata olímpica, obtida precisamente na edición de Tokyo, 17 medallas europeas e 15 a nivel mundial.
Despois de 24 anos de traxectoria profesional no ámbito do piragüismo, Portela intentará agora conseguir unha das máximas condecoracións do Estado español no ámbito deportivo.
Participacións olímpicas
Teresa Portela participou nos seus primeiros Xogos Olímpicos na edición de 2000, que decorreu en Sidney. Catro anos despois, nos Xogos Olímpicos de Atenas, a galega acadou dous quintos postos nas probas de K2 500 metros e K4 500 metros.
En Beijing 2008, a piragüista repetiu o quinto posto na categoría de K4 500 metros. Xa en Londres 2012, mellorou o seu rexistro e acadou un cuarto posto en K1 200 metros.
Nos Xogos Olímpicos desputados en Río de Xaneiro en 2016, obtivo un sexto posto na mesma categoría que en 2012.
Finalmente, en Tokyo 2020 obtivo o seu mellor resultado, conseguindo a prata na categoría de K1 200 metros.
