"Considerando o principio de igualdade entre homes e mulleres, coma a igualdade de oportunidades, entendemos que é xa tempo de que o fútbol feminino sexa incluído no cartel do Teresa Herrera", transladoulle o grupo local de Compromiso por Galicia da Coruña ao Deportivo a través dunha carta que o secretario local, Xoán Antón Pérez-Lema, dirixiu ao presidente do clube, Augusto César Lendoiro.
Porén, a reclamación desta formación política, que vén recoller unha petición da Asociación de xogadoras de fútbol e de Mudega --Mulleres deportistas galegas-- aparecía recollida de maneira literal nun rogo que o Bloque levou ao pleno do Concello da Coruña na primeira semana deste mes, e cuxo debate vetou o grupo municipal do PPdG.
O obxectivo era que o goberno local emprazase ao Deportivo a introducir o fútbol feminino no decano dos trofeos deste deporte na Galiza, que este ano fará 67 edicións e que non tomou en conta as mulleres futbolistas en ningunha delas. En virtude do convenio asinado entre o R.C.Deportivo e o Concello da Coruña o 7 de agosto do ano 2000, unha comisión de seguimento composta por representantes das devanditas entidades é a que ten a competencia de decidir que equipas disputan o trofeo. Neste órgano, o Concello podería propor que, paralelamente ao torneo masculino, se realizase tamén un Teresa Herrera feminino.