A Liga de Fútbol Profesional (LFP), co aval da Xustiza española desde o pasado mes de xuño, retomou a programación de partidos nas noites das segundas feiras, o que nos impide dar debida cobertura do choque que enfronta Osasuna e Celta na noite de hoxe.
Por sorte, o Club Deportivo Lugo non foi vítima esta xornada das ambicións de Javier Tebas por abranguer todas as franxas horarias, e nun choque moi sólido sumou un novo empate (0-0) no seu segundo compromiso da tempada, disputado no Ángel Carro ante a Real Sociedade B.
Rubén Albés sacou peito despois do encontro, destacando o mérito do punto logrado ante un conxunto recentemente ascendido, pero que deu a sorpresa superando no seu debut un dos máximos candidatos ao ascenso, o Leganés: "Estivemos moito máis preto da vitoria ante un rival de nivel que non tirou a porta en todo o partido".
Ademais, reivindicou o "desquite" que supón para el e máis para os seus homes o feito de que sexan considerados case unanimemente como un dos principais candidatos para o descenso, sinalando que gustan de "remar a contracorrente".
Reminiscencias de Nafti
Con respecto ao partido, desde logo que as 1.657 persoas presentes no coliseo lucense non asistiron a un espectáculo de fútbol no sentido máis estrito do termo, pero a cambio tiveron algo tan ou máis importante que o equipo perdera hai moito tempo: tranquilidade.
Os vascos, a pesar de sumar 67,1% da posesión, non puxeron en apuros en ningún momento a meta defendida por Whalley. De feito, as escasas ocasións viron da man do xogo directo do Lugo, que en ocasións fixo lembrar a aquel sólido bloque construído por Mehdi Nafti a mediados da tempada pasada.
Chris Ramos, Señé, un posíbel penalti non sinalado sobre Gerdard Valentín... a pesar de non ter o control do balón, o fútbol vertical e directo dos de Rubén Albés superou o deseñado por Alonso, aínda que sen a fortuna de traducirse en goles.
Agora, coa escuadra albivermella instalada no medio da táboa, e sen perder de vista o foco do único obxectivo, a salvación, o novo Lugo da 2021/22 mostra razóns para afrontar con optimismo non só o choque deste domingo ante o Valladolid, senón o resto da tempada.