Sen pragmatismo non tes futuro na liga da Segunda División. O resultadismo é unha forma de vida, e de supervivencia na categoría. Se o analisamos así, o arranque de campionato do Deportivo non está mal: un empate e unha vitoria en dous partidos consecutivos fóra de casa. Fiquen con este dado: ningunha das equipas que ascendeu o pasado curso superou 50 por cento de vitorias durante a liga. Isto non é a Primeira División.
Sofreu, e ben, o Deportivo durante os primeiros 45 minutos. Monólogo estremeño e resistencia branquiazul. Todo un test para a pizarra de Natxo González, o treinador do combo coruñés. Estamos perante o típico entrenador que ten este discurso: sobre todo que non nos marquen, que nós xa faremos un gol de cando en vez. Ben, talvez non sexa a retórica que namore as bancadas, mais hai que recoñecer que con técnicos que interpretaban tonadas distintas Riazor tampouco é que gozase precisamente nas últimas temporadas.
Non é que a equipa dispoña de goleadores cun grande currículo, mais Quique González —punta baixo sospeita polos magros números da súa última temporada no Osasuna— fixo o seu traballo cando a equipa máis o necesitaba, no comezo da segunda parte. O seu gol mudou o curso do xogo. A partir daí, o Dépor aínda se debruzou algo sobre a portería rival da man dun futebolista, Carles Gil, cuxo rango técnico está moi por riba da categoría en que neste momento xoga.
Debutou, e deixou boas sensacións, o ex xogador de Las Palmas Vicente. Ben na movimentación da bola, ben na intensidade.
Co 0-1 o partido estivo onde o quería ter Natxo González. A solidez defensiva e a inspiración dun Dani Giménez cada día máis dono da porteria branquiazul ocupáronse do resto.
Estremadura UD: Manu García, Álex Díez, Pardo, Djaló, Pomares, Álex Barrera, Fausto Tienza (Borja Granero, min. 64), Carlos Valverde (Diego Capel, min. 64), Kike Márquez (Chuli, min. 75), Enric Gallego e Rennella.
RC Deportivo: Dani Giménez, David Simón, Domingos Duarte (Pablo Marí, min. 59), Bóveda, Diego Caballo, Álex Bergantiños, Pedro Mosquera, Vicente Gómez (Didier Moreno, min. 74), Carles Gil (Christian Santos, min. 85), Quique e Borja Valle.
Gol: 0-1 Quique (min. 49).
Árbitro: De la Fuente Ramos (c. castellano-leonés). Cartóns amarelos a Álex Barrera (min. 26), Fausto Tienza (min. 55), Vicente Gómez (min. 59) Álex Díez (min. 78), Christian Santos (min. 89) e Djaló (min. 90).
Incidencias: partido correspondente á segunda xornada de LaLiga 1|2|3 disputado no Estadio Francisco de la Hera ante 10.827 espectadores.
PD: O partido deitou unha má nova: o central portugués Domingos Duarte —fixo no esquema de Natxo González— escordou o nocello esquerdo e é seria dúbida para o próximo encontro do Dépor (terceira saída consecutiva, desta volta a Tenerife, sábado ás 20.30 horas).