A afección do Celta asistiu nesta última xornada ao primeiro triunfo do conxunto olívico en Balaídos desde o pasado 2 de outubro. O gol de Iago Aspas, así como o asubío final do colexiado Iglesias Villanueva, festexáronse en grande no coliseo celeste, aínda que non na bancada de animación.
Onde habitualmente impera o bulicio, reinaba o silencio. Aínda que nun principio a razón parecía estar na obriga da retirada dunha faixa a prol das seleccións deportivas galegas, a causa semella outra.
Segundo fontes consultadas por Nós Diario, as forzas de seguridade identificaron un seareiro por un asunto acontecido nun partido anterior. A peña Tropas de Breogán, que exhibiu a devandita faixa a prol das selección galegas, abandonou en bloque o Municipal de Balaídos.
O resto da bancada de animación que decidiu permanecer no recinto optou por dirixir as súas queixas cara ao banco de autoridades, pedindo a dimisión do presidente Carlos Mouriño, cada vez máis cuestionado pola súa xestión social e deportiva.
A falta de fichaxes, "arrimar un ovo contra o outro"
No eido estritamente deportivo, hoxe é o último día do mercado do inverno e o triunfo sobre o Athletic de Bilbao non agocha unha necesidade de reforzos que até o propio Iago Aspas pide cada vez que ten ocasión, chegando a afirmar que "se non veñen máis compañeiros, tocará arrimar un ovo contra o outro e apertar todos xuntos".
Esas incorporacións dependen da saída do marxinado Denís Suárez, que xa está en Barcelona para ser futbolista do Espanyol até o 30 de xuño. Agora, a pelota está no tellado de Mouriño e o seu asesor deportivo, Luís Campos.
