Teresa Portela logra billete para os Xogos Olímpicos de Tokio 2020, marcando un fito histórico xa que será a sexta vez que compita neles. A canguesa gañou a praza ao facerse co bronce na final do K1 200 do Mundial de Szeged, en Hungría.
A canguesa, de 37 anos, ten por tanto praza na capital xaponesa. Portela foi quen de superar un mal inicio e porse na meta co bronce igualando o resultado coa danesa Emma Aastrand Jorgensen. Ambas as dúas partillan o terceiro posto do podio.
O vigués Roi Rodríguez fixo 3:42.22 e acabou oitavo na final de K1 1.000. O título de campión mundial foi quitoullo o húngaro Balint Kopasz tras completar a carreira en 3:36.07.
O pontevedrés David Barreiro terminou no oitavo lugar do C1 500 metros. Venceu o alemán Sebastian Brendel e o búlgaro Angel Kodinov fíxose coa prata e o moldavo Oleg Tarnovschi coa medalla de bronce.
Teresa Portela Rivas naceu en Cangas do Morrazo en 1982 e compite en piragüismo na modalidade de augas tranquilas.
Gañou 14 medallas nos campionatos do mundo de Piragüismo entre os anos 2001 e 2015, e 17 medallas nos campionatos de Europa entre 2001 e 2013.
Nos Xogos Mediterráneos fíxose con dúas medallas de prata en 2005 e 2009 en K1 500 metros e medalla de ouro en 2018 no K1 200 metros.
Participou en 5 Xogos Olímpicos de Verán, entre os anos 2000 e 2016, disputando cinco finais, obtendo 5º lugar en Atenas 2004 (nas probas de K2 500 metros e K4 500 metros), 5º lugar en Pequín 2008 (K4 500 metros), 4º lugar en Londres 2012 (K1 200 metros) e 6º lugar en Río de Janeiro 2016 (K1 200 metros).