A Real Federación Española de Balonmán ( RFEBM) abriu durante a xornada de onte as votacións para as once categorías propias do deporte -as sete posicións clásicas, Mellor Defensora, Mellor Nova Promesa, Mellor Adestrador e a MVP-, e os afeccionados e afeccionadas poderán votar até o vindeiro día 8 de xuño.
A tempada 2019-2020, concluída con 16 xornadas disputadas, coñecerá aos seus nomes máis destacados logo da publicación do listado de candidatas, que é resultado dunha primeira criba realizada exclusivamente polos adestradores dos 12 equipos que disputaron esta tempada a Liga Guerreiras.
A porteira Marisol Carratú, a central Carmen Campos, a lateral dereito Paulina Buforn, o técnico José Ignacio Prades e a pivote África Sempere polas súas cualidades defensivas son as candidatas do Mecalia Atlético Guardés para o equipo ideal da Liga Guerreiras Iberdrola 19/20.
Desde a RFEBM apuntan que cada xogadora ou adestrador nomeado contará cun vídeo que servirá como carta de presentación e como obxecto para as votacións tanto na web como nas respectivas redes sociais da liga Guerreiras Iberdrola.
Haberá ata cinco vías para votar, e o resultado final obterase a través da suma das seguintes porcentaxes:
App RFEBM | Supoñerá 60% dos votos totais. Poderán votar tanto usuarias xa rexistradas como novas usuarias, cunha aplicación que pode descargar a través de iOS e Android.
Twitter | Supoñerá 10% dos votos totais. Teranse en conta a cantidade de rechíos que reciba cada vídeo subido ao perfil oficial da Liga Guerreiras Iberdrola. En caso de empate, atenderase ao número de gústame dos vídeos implicados.
Facebook | Supoñerá 10% dos votos totais. Teranse en conta a cantidade de compartidos que reciba cada vídeo subido ao perfil oficial da liga Guerreiras Iberdrola. En caso de empate, atenderase ao número de gústame dos vídeos implicados.
Instagram | Supoñerá 10% dos votos totais. Teranse en conta a cantidade de gústame que reciba cada vídeo subido ao perfil oficial da Real Federación Española de Balonmán.
Youtube | Supoñerá 10% dos votos totais. Teranse en conta a cantidade de reproducións que reciba cada vídeo subido á canle da Real Federación Española de Balonmán.
