A semana pasada chegaron a San Lázaro os lotes de trofeos que conforman a historia do club branquiazul. O Compostela recuperou o seu patrimonio, perdido en poxa no ano 2006. O ex presidente da entidade deportiva José Albarrán adquiriu nese momento a titularidade dos trofeos co obxecto de preservar a memoria do equipo.
A actual directiva da Esedé conseguiu recobrar os galardóns. Estes días estase a realizar o inventario para contabilizar e limpar todos os trofeos, placas honoríficas e medallas que o Compos conseguiu nos seus cincuenta anos de vida deportiva. Abrirase unha sala no estadio de San Lázaro para expor os premios, na que se honrará a figura de Albarrán e que será inaugurada (previsibelmente) a próxima semana. Varios membros da peña Fontesequelo estiveron a colaborar na limpeza e colocación dos trofeos.
Concurso de escaparatismo
O concurso de escaparatismo convocado pola S.D. Compostela para festexar o medio século de vida da entidade deportiva está a chegar á súa fin. Nos próximos días o xurado reunirase para elixir os dous premiados.
O certame, dirixido a todos os estabelecementos comerciais e hostaleiros da cidade, fixo partícipe o sector comercial nos actos conmemorativos do 50º aniversario do club. Varias tendas da cidade vestiron o escaparate de azul e branco. Fotografías, recortes de prensa, camisetas e trofeos da Esedé foron exhibidos nas vidreiras do comercio santiagués.
Perto dunha vintena de estabelecementos participaron no concurso, mostrando dende o 2 de maio o traballo realizado. A arte final do escaparate manterase ata este sábado, 19 de maio.
