O torneo da xogadora do Club Xadrez Padrón Golfiño foi espectacular, tendo en conta, entre outras cousas, que no ranking inicial ocupaba a décimo terceira praza. A súa xesta é xa un capítulo na historia do deporte galego.
Que se sente ao ser a primeira muller en gañar o Campionato Galego absoluto de xadrez?
Sentinme xenial desde antes de saber que estaba no primeiro posto. Fixen boas partidas, fun subindo e gozando do torneo, sen preocuparme excesivamente. É unha satisfacción moi grande e ogallá o consigan moitas rapazas máis para que deixe de verse como algo raro ou inimaxinábel. E, por suposto, eu vouno seguir intentando coa esperanza de volvelo conseguir.
Como decorreu o torneo tendo en conta que no ranking inicial saías de décimo terceira?
A verdade é que estudaba polas mañás para a carreira (estou facendo Enxeñería Química na Universidade de Santiago), baixaba a comer e preparaba un pouco antes da ronda xa pola tarde. Ía partida a partida e intentaba non pensar na clasificación final.
O xadrez segue a ser un deporte maioritariamente masculino?
Si. De 75 participantes neste campionato, só eramos catro rapazas. E iso adoita ser a tónica habitual.
Canto tempo lle dedicas á semana?
Pouco. Xogo os sábados pola tarde a liga, mais nin tan sequera a preparo porque desde que comecei na universidade coas prácticas pola mañá e as clases pola tarde non teño tempo para moito máis. Eu empecei a xogar ao xadres aos 11 anos, que xa é un pouco tarde en comparación dos demais.
