A cidade de Lugo, coa súa muralla como protagonista, deu onte a saída á primeira etapa da volta ciclista O Gran Camiño.
Coa ollada posta no parte meteorolóxico, o inicio prometía cunha saída neutralizada na que os corredores deron unha volta simbólica á Muralla.
Ademais, a vicepresidenta da Deputación de Lugo, Maite Ferreiro, e o deputado de Deportes, Efrén Castro, antes, entregaban un caravel e unha lámina conmemorativa do Día de Rosalía de Castro aos cinco ciclistas galegos participantes e o danés Jonas Vingegaard, actual campión do Tour de Francia e gran reclamo desta volta galega.
Xa na estrada, a neve que caía en Sarria obrigou a ter que suspender a etapa cando faltaban quince quilómetros para a meta.
O pelotón neutralizou unha escapada de nove ciclistas uns minutos antes da suspensión.
Agora o comité de carreira terá que decidir se manteñen as bonificacións dos ciclistas que lideran a clasificación nos pasos por puntos (camisola verde) ou de coroar portos (camisola negra).
Os tempos de onte, ao quedar cancelada a etapa, non se terán en conta para a volta.
