O montañismo galego está a vivir unha nova etapa, polo menos no que respecta á súa federación. Coa entrada en decembro dunha nova directiva, presidida pola adestradora e deportista Josefina Maestu Almeida (Vigo, 1973), entraron novas ideas que buscan revolucionar o panorama desta disciplina na Galiza.
A nova responsábel explica a Nós Diario que aínda están no proceso de “inventario da situación” mais xa comezaron a actuar “respondendo aos principais problemas das diferentes especialidades e instaurando unha absoluta transparencia, algo que non existía antes”.
Para a viguesa “é fundamental facer sentir a deportistas, clubs, árbitros e técnicos a presenza da federación” como entidade “preocupada polos seus problemas”.
Para Maestu é “un desafío tamén como muller, a primeira neste cargo na federación”. Entre os seus obxectivos está “modernizar esta institución, unha das que máis potencialidades ten no deporte galego”.
Pon como exemplo o número de persoas que practica sendeirismo sen estar federadas “un 30%, asumindo o risco que ten non contar con seguros en caso de accidentes e rescates”.
Potenciar o sendeirismo e a marcha nórdica
Coa intención de fomentar a participación e o achegamento á federación, ademais da realización de xornadas de tecnificación en alpinismo e outras disciplinas, este organismo está a promover a marcha nórdica coa realización da primeira proba da Copa Xunta da Galiza que decorrerá este domingo en Lugo.
Outra das iniciativas foi a creación da I Liga galega de sendeirismo, unha competición que se iniciou en Noia e Marín en febreiro e que continuará durante todo o ano pasando polas comarcas do Condado, Valdeorras, O Barbanza ou A Coruña.
Deporte nas Fragas do Eume
O pasado mes de decembro, a Federación Galega de Montañismo (FGM), cunha xunta directiva recén renovada, decidiu presentar alegacións ao proxecto de decreto dos plans de ordenación dos recursos naturais e de uso e xestión do Parque natural das Fragas do Eume, unha proposta da Xunta que, segundo aseguran desde a federación, “afectaba de maneira considerábel a práctica de distintas modalidades de deportes de montaña”.
Esta semana chegou a resposta favorábel ás alegacións e foi recibida “con satisfacción” pola federación da Galiza. A presidenta deste organismo, Josefina Maestu, lembra a Nós Diario que “se non o fixeramos neste caso, e noutros, en moitos espazos protexidos da Galiza non poderiamos realizar ningún tipo de actividade deportiva”.
Algo que, sinala, afectaría o montañismo, unha práctica que “ama, valora e respecta a natureza".
No caso das Fragas do Eume pensan editar unha guía das zonas visitábeis e indicar o número de persoas autorizadas para acceder coa intención de "facilitar o acceso ás persoas federadas".