O Grove vai acoller este sábado a I Regata de Bateis Lavanova, organizada polo clube de remo Mecos, e no que tomarán parte por volta de medio milleiro de vogador@s. Un total de 20 clubes asisten a esta cita en augas arousáns, na que se competirán en sete categorías: tres femininas e cuatro masculinas. Unha novidade é que se permite a composición de tripulacións mixtas, se ben eses puntos non suman para a clasificación.
Esta competición no Grove servirá de termómetro para testar a situación do banco fixo galego en bateis, modalidade onde Galiza é toda unha potencia. Cómpre lembrar que no pasado Campionato de España de bateis o noso país impúxose en todas as categotías: Sete de sete en bandeiras e 14 das 21 medallas en liza foron para clubes de Galiza, que competiron nesa edición con bateis de Euskal Herria e Cantabria. Así, no grupo de promesas feminino a embarcación vencedora foi a de Robaleira, mentres que na segunda categoría o primeiro posto conquistouno Ares e na absoluta a bandeira foi para a tripulación de Meira. No que atinxira ás regatas da categoría masculina, Tirán fora a gañadora en absoluta, A Cabana en infantil e Tirán en Cadetes. É de salientar o feito polo batel de Rianxo, que se proclamara vencedor en xuvenís, obtendo así a súa sexta bandeira consecutiva.
A fotografía interior que ilustra esta nova é de Xoán Antón Castro
