Informan da detención de tres dos presuntos asasinos de Jimmy

Segundo 'El Confidencial' acabarían de ser capturados pola policía en Madrid e se lles considera os autores materiais. O deportivista falecido foi enterrado en Feáns, sen presenza da actual directiva pero si de Lendoiro.

jimmy-crop
photo_camera Faixa de homenaxe a Jimmy

Tres persoas foron detidas hoxe en Madrid como presuntas responsábeis materiais do asasinato de Francisco José Romero, Jimmy, o seareiro do Dépor que foi atacado por neo-nazis do Atlético de Madrid, do Frente Atlético, que o golpearon con barras de ferro na cabeza -o que segundo a autopsia causoulle a morte- e logo o guindaron ao río Manzanares. 

Segundo un chío do diario web El Confidencial, tres persoas foron detidas hai máis dunha hora e serían as involucradas directamente no asasinato. Fontes da policía mantiñan desde onte que estaban identificados grazas á existencia de vídeos nos que se vía o suceso. 

Por outra parte, o cemiterio coruñés de Feáns acolleu o enterro do membro dos Riazor Blues asasinado no Manzanares. Acompañado da súa familia e amigos, unhas 200 persoas- non houbo presenza da actual directiva do Deportivo, que polo contrario mesmo decidiu pechar a bancada desa claque durante dous partidos e ameaza con prohibirlle a entrada ao estadio. Si estivo presente no enterro o anterior presidente do club, Augusto César Lendoiro. Xa o día antes, un membro da que fora a súa directiva durante 25 anos, Pachi Dopico, pasou polo tanatorio onde descansaban os restos de Jimmy, en cuxo recordo apareceron algunhas faixas pola cidade da Coruña. O enterro estivo rodeado dunha impresionantesmedidas de seguridade, con varios furgóns policiais. 

Comentarios