A radio coruñesa perdeu todo un referente. O xornalista Manolo Castelo faleceu na noite desta cuarta feira aos 79 anos de idade, segundo vén de informar Radio Coruña-Cadena SER, que se despediu del "con todo o cariño que se lle tiña".
"A súa vida non pode ser contada sen falar da radio, desta radio, e sen o Deportivo", lembraron os seus compañeiros e compañeiras.
Ao longo da súa dilatada traxectoria, Castelo narrou máis de 1.000 partidos do equipo branquiazul, incluíndo os grandes éxitos do 'SúperDépor'.
De feito, o propio Real Club Deportivo, alén de moitos compañeiros de profesión, quixo agradecerlle o seu labor cunha mensaxe publicada nas redes sociais.
"Fuches coa túa voz, cando só a radio estaba xunto aos nosos para contar en directo á nosa forza o que pasaba polo mundo adiante, os ollos de varias xeracións de deportivistas", sinalaron desde o clube.
Fuches coa túa voz, cando só a radio estaba xunto a #osnosos para contar en directo #ánosaforza o que pasaba polo mundo adiante, os ollos de varias xeracións de #Deportivistas.
— RC Deportivo (@RCDeportivo) December 21, 2022
DEP Manolo Castelo 💙 Toda #anosaforza para os teus https://t.co/qTERQnxN63
