Dobra o número de participantes na segunda edición das Olimpiadas Populares Galegas

Perto de 200 atletas e un total de 17 equipas competirán esta fin de semana en Teo por conseguir o trofeo agora en mans de Siareiras Galegas.
photo_camera Foto tirada de http://olimpiadaspopularesgalegas.blogaliza.org/

Serán 195 as e os atletas que esta fin de semana competirán en Pontevea, (Teo) na segunda edición das Olimpiadas Populares Galegas que organizan o Centro Social Arredista e o CSO da Casa do Vento. Este ano incorporaranse dúas novas disciplinas: a chave e o tiro de corda.

O acto inaugural -o sábado, ás 9 da mañá- consistirá nunha carreira de revezamentos na que se conducirá o facho aceso dende a Ramallosa a Pontevea. O final do traxecto, ao pé da ponte romana sobre o Ulla, do lado do concello da Estrada, será o escenario en que terán lugar as arengas de apertura.

As probas desenvolveranse en dúas zonas, A Burga e o campo do CF Praíña. Na primeira, que é onde estará emprazada a zona de acampada libre, terán lugar o sábado as probas de salto de lonxitude, pentasalto e triatlo, e xa o domigo as de tiro de corda, chave, 5.000 metros, loita galega e brilé. No campo do Praíña desenvolveranse as de tiro con fisga, billarda, voleibol, tiro de sacho, 100 metros e 4 x 100 metros o sábado.

Varios colectivos cívicos correran a cargo das comidas solidarias. Semente, o proxecto educativo impulsado pola Gentalha do Pichel a prol do ensino en galego, encargarase do xantar do sábado. Ceivar, que presta o seu apoio e soporte xurídico ás presas e presos independentistas, correrá a cargo da cea do sábado. E Represaliadas pola Okupaçom da Sala Iago en Compostela, pendentes aínda de xuízo tralo desaloxo do pasado novembro, organizará o xantar do domingo.

Comentarios