A primeira media hora de xogo foi o encontro entre unha equipa liliputiense, como un combo xuvenil, contra unha equipa de futebolistas profisionais. Durante ese lapso de tempo, o Real Madrid -cheo de suplentes, 9 caras novas a respeito do clásico co Barcelona- marcou dous goles e esa foi a mellor noticia para un Deportivo que, como acontecera en Anoeta, non compareceu sobre o céspede. O pior para a escadra galega é que os suplentes do Madrid teñen fame e saen ao campo cunha idea entre cella e cella, facerlle a vida o máis difícil posíbel a Zidane (como é posíbel que o treinador francés aliñara Bale en pésimas condicións físicas e deixara Isco sen utilizar fronte a Messi e os seus colegas?).
Visto o visto, o Madrid levantou algo o pé do acelerador consumidos os primeiros 30 minutos, conxuntura que Florin Andone aproveitou para se reconciliar co gol, nunha xogada con certa fortuna (non, Guilherme non quería asistir o romanés, aquilo non foi un pase, senón un chut bastante despropositado).
O gol de Andone criou un certo espellismo e o Dépor reparou en que estaba a xogar un partido de Primeira División face un dos grandes. Durante dez minutos fixo aquilo que cabía agardar que fixera durante todo o xogo. Correr. Presionar. Etc. E o traballo estivo a piques de dar froitos. Mais non. Isco -imperial toda a noite- decidiu reivindicarse por enésima vez e do seu maxín brotou a acción que puxo o 0-3 no taboleiro de marcas, obra de Lucas Vázquez, o eléctrico punta de Curtis.
Na segunda parte, o Dépor voltou a desaparecer -agás en accións isoladas, como no segundo gol de Joselu- e o Real Madrid incrementou a conta en tres tantos máis. O resultado foi un set, 2-6, mais puido ser ben máis avultado. Baste dicer que un dos mellores deportivistas foi -até que se lesionou- Germán Lux, non así o seu relevo Tyton, co-autor do cuarto gol branco ao papar unha bola perfeitamente parábel propulsada por Casemiro.
Razóns para temer o descenso? Aritmeticamente exiguas. O Sporting aínda o está a facer pior que o Dépor. Mais o asunto non está aí. O asunto está en que o Dépor neste momento ten máis fasquía de equipa filial do que de equipa profisional. Non admira, portanto, que na conferencia de imprensa posterior ao encontro, Pepe Mel abeirase o rexisto melodramático: "Temos que replantexarnos moitas cousas de cara a Pamplona [próxima saída branquiazul], se teño que levar xogadores do Fabril ante Osasuna o farei".
RC Deportivo: Lux (Tytoń, min. 46), Juanfran, Arribas, Sidnei, Luisinho, Guilherme, Álex Bergantiños, Carles Gil (Joselu, min. 57), Emre Çolak, Kakuta (Fernando Navarro, min. 46) e Andone.
Real Madrid: Kiko Casilla, Danilo, Nacho, Varane (Álvaro Tejero, min. 88), Marcelo, Kovačić, Isco (Casemiro, min. 79), James Rodríguez, Lucas Vázquez, Morata e Asensio (Mariano, min. 79).
Goles: 0-1 Morata (min. 1); 0-2 James Rodríguez (min. 14); 1-2 Andone (min. 35); 1-3 Lucas Vázquez (min. 44); 1-4 James Rodríguez (min. 66); 1-5 Isco (min. 77); 2-5 Joselu (min. 84); 2-6 Casemiro (min. 87).
Árbitro: Sánchez Martínez (c. murciano). Cartóns amarelos a Arribas (min. 67), Isco (min. 68), Joselu (min. 90+2) e Emre Çolak (min. 90+3).
Incidencias: 34 xornada de liga. 26.788 espectadoras e espectadores no estadio de Riazor.