José Ramón de la Morena, xornalista deportivo, dixo esta mañá na SER, no seu comentario diario no programa Hoy por Hoy, que en Vigo non se quixo a Salva Ballesta por ser "demasiado español" e que Carlos Mouriño, o presidente do Celta, se pregou por medo aos "independentistas".
De la Morena oculta que a oposición a Salva non é pola súa maior ou menor identificación con España, senón pola súa ideoloxía ultradereitista e pola súa devoción a Tejero.
De la Morena menosprezou a Mouriño ao que se referiu como "un tal Mouriño" e mandou un recado a Abel Resino, de quen agarda que non sexa "sumiso" ao presidente do Celta.
A caverna mediática con Ballesta
A caverna mediática posicionouse onte co ultradereitista e contra o Celta por rexeitar a súa incorporación como segundo treinador da equipa viguesa. O ABC leva o tema á capa de deportes co titular "Vetado por sentirse español" e, como todos os demais medios, centra a súa información nas declaracións de Salva Ballesta. Como ilustración escolleron unha fotografía do ultradereitista facendo o saúdo militar e nun avión de combate.
A COPE asegurou que non se contratou a Ballesta "polo rexeitamento masivo dun grupo ultra de seareiros" e o propio ultradereitista admitiu que todo comezou "nas redes sociais"
![Publicidade 195255]()
En La Razón tamén aproveitaron as declaracións de Ballesta nas que asegura que "é unha mágoa que nos tempos nos que estamos se confunda a política co deporte" sen ter en conta que o propio ex-xogador do Atlético de Madrid creou esta situación após unha traxectoria marcada polo súas declaracións políticas. Na información Ballesta carga contra o agora treinador do Celta, Abel Resino, dicindo que respecta "a súa decisión mais eu non houbera asinado se me din que non podo levar ao meu segundo, o meu equipo deportivo técnico vai comigo e cae comigo".
A información máis dura é a de Intereconomía que titula "O Celta veta a Salva Ballesta" e asegura que "os Celtarras" frearon a contratación de Salva Ballesta como segundo treinador de Abel Resino". Na mesma cadea de televisión no mes de abril Ballesta declaraba que "eu non vou a descubrir que tendencia teño, ante todo son español, e defendo ao meu país en todo o que poda. Se hai xente que vive en España, que é catalán ou vasco, síntase ou non se quera sentir español, tense que foder porque naceu en España".
De madrugada, na COPE, o ultradereitista quixo suavizar a situación e dixo que "non teño nada en contra dese grupo de seareiros, respecto a súa opinión" e que "a política" non lle interesaba. A cadea de radio asegurou que non se contratou a Ballesta "polo rexeitamento masivo dun grupo ultra de seareiros" e o propio ultradereitista admitiu que todo comezou "nas redes sociais".
