A SD Compostela acordou esta cuarta feira o cesamento de Fabiano Soares como adestrador do primeiro equipo da entidade. Fabiano estivo vinculado ao club e formou parte da historia do mesmo desde principios dos anos noventa, primeiro como xogador e posteriormente como adestrador en dúas etapas diferentes.
A través dun comunicado, o club anunciou a decisión e quixo "agradecer o compromiso, o traballo e a dedicación absoluta que Fabiano sempre demostrou, así como o afecto e o agarimo que tivo sempre coas cores do club".
Ademais, a entidade desexoulle "sorte nos seus proxectos futuros". Por outra parte, o club, que está segundo na clasificación, informou que traballa na procura dun substituto, aínda que de forma interina farase cargo do equipo o segundo adestrador, Jose Manuel Rodríguez.
