A columbofilia leva anos entre nós. Este deporte, pouco coñecido a nivel xeral no país, trouxo a competición das pombas mensaxeiras até a Galiza a finais dos anos 40 cando se funda o primeiro club en Vigo. Moito mudaron os tempos e tamén a maneira de competir.
O presidente da Federación de Columbofilia Galega, Gonzalo Liñares, explica a Nós Diario que agora as probas "son máis exixentes". Daquela esta práctica deportiva "baseábase en pombas criadas na casa, transferíanse os xenes dunhas a outras" e na actualidade, conta, hai poxas de animais que poden chegar a prezos enormes, como a pomba que se vendeu en Bélxica por 1.600.000 euros".
Tamén mudou o seu propio coidado. "Antes tiñamos que facer nós a comida e hoxe en día hai alimentos especiais para os animais segundo sexa tempo de muda ou de competición", asegura.
Comezar desde o adestramento
O que non cambiou foi o sistema que teñen as persoas que practican a columbofilia. "Tes que adestrar pombas mensaxeiras nun pombal e cando saben cal é a súa casa comezan a competir", relata Liñares desde o lugar onde ten as súas, nunha parroquia de Compostela.
"Despois é cuestión de meterlles quilómetros, por exemplo comezando por 10 e pasando logo até 30 e subindo os que se precisen para completar as diferentes competicións", sinala este columbófilo.
A proba máis importante que organiza a federación galega é a que comeza na localidade catalá de Lloret de Mar e na que as pombas teñen que percorrer case 950 quilómetros de distancia até Compostela.
Estes animais, que poden pesar 500 gramos, chegan a realizar en moitas ocasións ese camiño nunha soa xornada e sen descansar. "Houbo anos en que algunhas saíron ás 7 da mañá e ás 22 horas xa estaban no pombal", precisa Liñares, "son atletas fóra do común", engade.
Toda unha paixón
Lonxe dos grandes eventos que teñen outros deportes, a columbofilia é unha práctica que se realiza aproveitando o tempo de lecer que teñen as algo máis de 300 persoas que na actualidade están federadas. "Ten algo de rutina por darlle de comer a unha determinada hora para que se habitúen a estar adestrando na casa", asegura o presidente da federación.
Ao longo do ano hai diferentes probas a partir do mes de marzo. "Son sempre progresivas, partindo de 140 quilómetros e até a distancia que decida a asemblea cada ano", indica. Nas competicións contan con dous camións adaptados por zona (Compostela-A Coruña-, Pontedeume-Ferrol e Pontevedra-O Salnés, Vigo-O Porriño) que as soltan nun mesmo punto para que volvan ao seu pombal.
Os animais levan un microchip nas patas que identifica cada pomba e na chegada hai un reloxo que detecta cal é e rexistra a súa chegada.
Negro futuro polo cambio climático
O pasado mes de xuño, un incidente en Portugal deu a voz de alarma dunha situación que pode producirse máis veces e que afecta directamente a este deporte. Na competición que se realizaba entre Algarve e Porto, na que participaban ao redor de 10.000 exemplares, case un 30% non chegaron ao seu destino.
Após o chamamento realizado por autoridades e a propia organización, moitas foron rescatadas na Galiza e algunha en Asturies grazas á argola de cor que levan en cada pata.
"Voaron con temperaturas altas e foron buscando o fresco do mar. Cando se deron conta pasaron os seus pombais e foron dar á Coruña, Pontevedra e outros moitos lugares", afirma Liñares. Membros da federación acudiron á chamada e conseguiron voltar algunhas das pombas a Portugal.
Para a Federación esta situación é un aviso do que afecta o cambio climático a este deporte. "Dependemos moito da climatoloxía", admite o seu presidente. Cando fan probas accesíbeis desde Valencia ou Cartaxena teñen en conta as temperaturas e nunca as realizan cando se superan os 30 °C.
"Ningún atleta aguanta estas temperaturas e tampouco os animais", asegura o presidente, "nós contamos con delegados de solta e revisa as incidencias climatolóxicas ademais de estar en contacto cos meteorólogos".
As competicións continúan e esta pasada terza feira mesmo realizaron unha solta internacional desde Sevilla con participantes de Bélxica, unha das potencias europeas neste deporte, Holanda, Alemaña, Portugal, Galiza e do resto do Estado español. As primeiras pombas realizaron os 654 quilómetros chegando onte a partir das 9 horas ao columbódromo Rías Baixas.