Foi un partido de protagonistas. Nolito. Hiper-activo e desequilibrante no primeiro acto do xogo. Abriu a billa no minuto 4, nunha acción marca da casa, pleno de electricidade. Cuenca. Talento de Can Barça agora ao servizo da causa branca e azul. Transformou un atinado servizo de Juanfran desde a dereita para, no minuto 54, caracolear na cova da área celeste e, cun sutil toque do seu pé dereito, colocar a bola na portería viguesa. E Larrivey, combativo como sempre, quen sobrevoou a área do combo coruñés, sempre tan inocente nas xogadas a balón parado, para tornar un córner botado por Nolito no 2-1. Era o minuto 71 e xa non se voltaría a mover o taboleiro de marcas.
Mais a acción decisiva chegaría nos estertores do xogo. Minuto 89. Penalti após incursión de Cavaleiro, faiscante como sempre, e con desparpaxo para sementar o terror na zaga rival. O internacional portugués que se fai coa bola e que a quer pousar no ponto da máxima penalidade. O bosnio Medunjanin que se dirixe cara á el. O bosnio ten fixación polos penaltis. O bosnio que se apropria da bola. É o momento do xogo. Do partido. E aí aparece Sergio, 28 anos, o gardamallas de Catoira, o seu primeiro derbi. E caza o penalti. Despexa a bola. E aí acaba todo.
Disputa frenética
Foi un derbi intenso, de moita disputa, por veces frenético, sen marxe para o academicismo, con moita pelexa. O Celta tirou proveito da súa condición de equipa máis conxuntada e máis afeita á categoría. Tirou proveito tamén do estado de graza de Nolito e da astucia de Orellana. E talvez tirou tamén proveito da ausencia de JuanDo. Sen el o Deportivo ten moito menos futebol combinativo, está moito máis á mercé do rival.
Como acostuma acontecer nestes xogos, decidiron os detalles. E os detalles foron case todo celestes. O apampamento coruñés dos primeiros minutos (non é normal que nun derbi che fagan un gol no minuto 3 de xogo, faltou concentración na zaga e talvez Lux puido facer algo máis perante o disparo de Nolito). As xogadas a balón parado, un mal endémico do Deportivo. E, para concluír, o lance heroico de Sergio, un deses momentos que marca a carreira dun futbolista, unha acción que decide un derbi.
Como acostuma acontecer nestes xogos, decidiron os detalles. E os detalles foron case todo celestes
![Publicidade 196259]()
Gaña o Celta e suma xa 9 pontos en 5 partidos. Cae o Deportivo, mais cae con dignidade, recompondo a figura após a desfeita de Riazor face o Real Madrid. Suma 4 pontos e, desde logo, o domingo non pode fallar na casa perante o Almería.
Un bon derbi. Isto está comezando. E promete.
Celta: Sergio, Hugo Mallo, Cabral, Fontás, Planas, Radoja, Krohn-Dehli (Sergi Gómez, min.89), Álex López (Augusto, min.66), Orellana, Nolito (Jonny, min.82) e Larrivey
Deportivo: Lux, Laure (José Rodríguez, min.77), Lopo, Sidnei, Luisinho, Bergantiños, Mendunjanin, Cuenca (Cavaleiro, min.69), Fariña (Toché, min.84), Juanfran e Postiga
Goles: 1-0, min.3: Nolito; 1-1, min.54: Cuenca; 2-1, min.71: Larrivey
Árbitro: Del Cerro Grande, do comité madrileño. Amonestou a Fontás, Luisinho, Orellana, Laure, Sidnei
Campo: Estadio de Balaídos, 23.903 espectadores
