O Castro Trail Team defenderá na casa o título galego de carreiras de montaña

As carreiras por montaña (CXM), unha das modalidades máis duras do montañismo, terán na Galiza esta fin de semana unha das súas citas máis importantes: o X Castro Trail, unha das probas que conforman o Campionato galego de clubs. O evento decorrerá o 1 de setembro na parroquia da Valenzá, no concello de Barbadás (comarca de Ourense), e está organizado polo Castro Trail Team, unha das entidades punteiras desta disciplina e que leva tres tempadas seguidas conquistando o título. A xornada constará de dúas probas: a máis longa, de 24 quilómetros; a máis curta, de 12. Ademais, nesta ocasión engadiron a andaina, que tamén constará de 12 quilómetros e que está aberta a todo tipo de público. O presidente do club promotor, David Losada, explica en conversa con Nós Diario que a iniciativa xurdiu "pola paixón que tiñamos unhas cantas persoas por correr pola montaña". "Pensamos en preparar unha carreira polos montes de Barbadás e os seus lugares máis senlleiros", comenta. Ao feche desta edición había xa 267 inscricións mais, e cada ano o día da carreira chegan "aos 400 deportistas", contando con representantes "de todos os clubs galegos que están federados". Rubén Gomez gaña a segunda edición do trail da Costa da Morte Os Nosos Faros Voluntariado O Castro Trail foise modificando edición a edición, como recoñece Losada, que tamén compite, e collendo sona entre os grandes clubs desta modalidade deportiva. "Démoslle máis dureza e beleza ano a ano, pasando por lugares ben curiosos e espectaculares, ademais de recuperar os camiños tradicionais que estaban abandonados", sinala. Non é doado preparar todo coa suficiente antelación, como é o caso da limpeza de todo o percorrido, mais o mesmo día da carreira o traballo multiplícase. Para que se poida realizar en condicións a entidade ten o apoio de máis de 50 persoas voluntarias. "Hai que ter en conta os diferentes avituallamentos e tamén controlar algunhas zonas conflitivas do monte", asegura o responsábel do club. O Trail Andaina e Ribeiras do Tambre terá catro categorías Correndo para podio Nesta edición, o Castro Trail Team repite como favorito, con figuras como Elpidio Gómez, Emilio Montilla, Federico Losada e Marcos Pascual, que participarán no Campionato do mundo de Canfranc (Huesca, Aragón) do 13 ao 15 de setembro. Tamén estarán en Barbadás Mónica Carnero, Reyes Bóveda, Nélida Varela, Conchi Sierra, Daniel Lozano e Paco Muñoz. Con posibilidades tamén competirán José Manuel Gil e Eloy Martínez, do AC Castelos Trail, e Javier Janeiro e Xenxo Laso, do Arenteiro Trail. "Cada vez hai máis nivel nesta disciplina na Galiza", recoñece Losada. Entre as razóns que dá para confirmar esta opinión, a principal procede de constatar que "cada vez se preparan máis as carreiras, o adestramento e mesmo as dietas para conseguir bos resultados". Neste sentido, se antes era "só correr", agora introdúcense "exercicios de forza que se combinan con outros de bicicleta". En certa maneira, Losada cre que quen chegan ao podio "case podemos dicir que corren de maneira profesional". O Trail Adventure Muíños do Folón terá carácter solidario en 2024 Copa Xunta da Galiza A competición desta modalidade deportiva do montañismo continuará tamén en setembro, concretamente o día 15, coa realización da quinta proba da Copa Xunta da Galiza de Carreiras por Montaña-Trail dos Indios en Boiro (O Barbanza). Constará de dúas distancias: a de categoría absoluta, xunto coa de promesa, e a de júnior. A primeira consta de 26 quilómetros, cun desnivel positivo de 1.600 metros. A segunda denomínase 'trailiño' e ten 16 quilómetros e un desnivel positivo de 700 metros. Ambas as dúas terán tanto a saída (10 horas) como a chegada (14.30 horas) no pavillón de Santa Baia, en Boiro. Estas probas constarán de categorías absoluta masculina e feminina (18 a 45 anos), veterano masculino e feminino (maiores de 45 anos) e por equipos. A clasificación actual absoluta domínana Marcos Antonio Pacual (Castro Trail Team) e Guadalupe Rubio (Club Pasa ou Entorna); en júnior, Carlos Bao (Club Traileros Toxos e Birras) e Andrea Gómez (Club Asesou); en xuvenil, Roi Mourón (Club Tribu Trail) e Julia Salvado (Acade), e en cadete, Álex Tajes (Club Tribu Trail) e Sabela Tuñas (CDM Vértice). Por equipos, chegan até Boiro nos tres primeiros postos, respectivamente, o Club Asesou, o Club Running Sport Trail e o Club Traileros Toxos e Birras. A organización do I Trail do Cervo descobre petróglifos ocultos XX Andaina en Ribeira Entre o Campionato galego de clubs e a Copa, tamén dentro desta mesma modalidade da federación, a actividade non descansa. O 7 de setembro o municipio de Ribeira (O Barbanza) acollerá a XX Andaina, un evento con saída desde o polideportivo da Fieiteira que percorrerá lugares como a congostra de Subagriño, a senda do Río Artes, o Monte da Cidá e o Parque Natural das Lagoas de Carregal e Vixán. A proba, organizada polo Concello de Ribeira e a Asociación de Veciñas e Veciños de Carreira, contará con dúas distancias diferentes: 50 e 30 quilómetros.