Balaídos é público, seguirá a ser público e como tal está á disposición do Celta. Esta é a resposta que Abel Caballero, alcalde de Vigo, deu á proposta que pouco antes puxo sobre a mesa o presidente do Celta, Carlos Mouriño, que ligou o futuro do clube a que o estadio municipal se lle vendese. O rexedor dixo que daría unha resposta a Mouriño “cando coñeza en profundidade” a proposta sobre o campo. Mais xa adiantou que "Balaídos é un estadio público que seguirá a ser público e que o Celta ten e terá á súa total e enteira disposición. Desde logo nós non contemplamos a súa privatización en absoluto".
Caballero quixo destacar a relación “fluída” que ten o Concello coa directiva celeste, da que destacou o seu traballo e compromiso nestes anos. Sobre o estadio, destacou que a aposta do seu goberno é porque Vigo teña “un campo do nivel europeo que merece esta cidade. Un campo público, feito e refeito polo Concello en colaboración coa Deputación”.
Esta foi a resposta do alcalde vigués a Carlos Mouriño, que na súa comparecencia anunciou a proposta do Celta mercar Balaídos, proposta feita con aire de 'ultimato' para garantir o futuro do clube e non ter que vendelo a ofertas procedentes de fóra de Galiza.
