Seis goles en contra e só un punto sumado de seis posíbeis é o balance do arranque do Celta na Liga. O equipo do 'Chacho' Coudet sucumbiu o sábado en Balaídos ante o acerto do Real Madrid, ao que lle bastaron sete disparos a porta —dous deles desde os once metros— para anotar catro goles e fulminar un Celta que segue a xerar máis dúbidas que certezas.
Non faltou á súa cita co gol Iago Aspas, que marcou nos seis partidos disputados até o momento —catro amigábeis e dous de Liga— e que co penalti transformado ante os de Carlo Ancelotti puxo o empate no marcador após o tanto inicial de Benzema, tamén desde o punto de castigo, logo da intervención do VAR por unha man de Tapia na área.
O Celta, como o propio estadio aínda en construción, empurrou na primeira metade tentando adiantar o Madrid coa alta presión e a intensidade características de Coudet, mais cunha evidente falta de acerto nunha sala de máquinas na que Óscar Rodríguez non acaba de achar o seu sitio.
Modric rematou coas esperanzas celestes cun potente —e acertado— disparo desde a media lúa
O perigo chegou principalmente desde o costado esquerdo, cun excelso Javi Galán que tentou bater Courtois e buscou a cabeza de Paciência, que estivo perto de desequilibrar o marcador. Porén, Modric asestou un duro golpe antes do descanso cun potente —e acertado— disparo desde a zona de tres cuartos.
Xa na segunda metade, os merengues demostraron o seu poderío no contragolpe da man de Vinícius, que ampliou a vantaxe após derrotar en velocidade un Hugo Mallo que non seguiu o seu ritmo. Fede Valverde, no minuto 66, sentenciou o encontro nunha nova contra que rachou as costuras da zaga celeste.
O Celta agarda a chegada dun dianteiro titular que apuntale a liña ofensiva
"Non perdoan nada. Teñen xogadores que son dos mellores en cada posición e a súa efectividade quedou clara", dixo Coudet, que tamén pediu "tempo" para asentar as fichaxes no once e pulir un estilo de xogo que "por momentos viuse ben" este sábado. Quen si perdoou foi Hazard, nun penalti detido por Marchesín —quen tamén neutralizou o posterior disparo de Benzema—, mais en nada mudou a derrota.
Coudet agarda agora a chegada dun dianteiro co cartel de titular mentres esvaecen as opcións de reforzar outras parcelas ante a enquistada saída de Denis Suárez.
O Lugo apaña un punto en Tenerife
Após perder os tres puntos nos últimos minutos da súa estrea ligueira fronte ao Albacete, o Lugo de Hernán Pérez chegaba a Tenerife co obxectivo de inaugurar a súa conta particular nun encontro que se antollaba complexo diante dun equipo que o pasado curso ficou ás portas do ascenso. O conxunto tinerfeño dominou e efectuou até oito disparos a porta, fronte a dous da escuadra albivermella.
José Ángel puxo o primeiro tanto no marcador aproveitando un torpe despexe de Neyder Lozano e os tinerfeños exhibiron o seu dominio da pelota... Até que no minuto 58 Álex Corredera recibiu o cartón vermello directo por unha dura falta cometida a Xavi Torres. Seis minutos despois Alberto igualou o partido rematando con precisión un balón colgado por Zé Ricardo. E Manu Barreiro anotou o segundo no minuto 70, mais foi anulado por un claro fóra de xogo.
Din que en Lugo hai que sachar... E Alberto, pasando de heroe a vilán, sachou: foi expulsado no treito final do choque por derrubar fortemente o branquiazul Dauda, que foi retirado do verde en padiola. Sen apenas tempo para máis, o partido rematou en empate.
