Tres de tres. Pleno de triunfos galegos na Primeira RFEF que consolidan o liderado do Deportivo e achegan Celta B e Rácing de Ferrol ao play-off de ascenso á Segunda División, do que ambos xa están separados por tan só tres puntos.
Quen o tivo máis doado, con diferencia, foi o Dépor, pois os branquiazuis limitáronse a saltar ao terreo de xogo de Riazor até que o colexiado constatou protocolariamente que os futbolistas do Estremadura consumaron a súa ameaza de non desprazarse até A Coruña debido á folga que están desenvolvendo polos repetidos impagos da escuadra de Almendralexo.
O filial celeste, pola súa banda, esmagou o segundo equipo do Real Valladolid por 3-0 e o Rácing de Ferrol sacou petróleo do campo do Talavera, a quen superou por 1-2.
Primeira vitoria fóra da casa do Lugo
Subindo o foco até a categoría de prata, o Club Deportivo Lugo logrou ante o Amorebieta a primeira vitoria fóra da casa no que vai de tempada (1-3), éxito que vale moito máis que tres puntos, pois os vascos axexaban desde a zona baixa e os albivermellos mesmo poderían ter caído a postos de descenso de non ser quen de conseguir o triunfo.
Por sorte, Josep Señé, o goleador Carrillo -que emendaba así o seu desafortunado papel na acción do único tanto local- e Sebas Moyano fecharon un resultado que permite encarar con tranquilidade e optimismo o difícil duelo da próxima xornada ante o poderoso Eibar.
Fútbol internacional: España, OK; Portugal, KO
Faltou por unirse a esta festa do fútbol galego o primeiro equipo do Celta, pero as principais ligas de Europa pararon esta fin de semana a causa dunha serie de compromisos internacionais que fecharon a definitiva clasificación da selección española para o Mundial de Qatar 2022 logo de superar Suecia por un gol a cero nun choque no que o galego Brais Méndez disputou os últimos catro minutos.
Menos sorte tivo Portugal, pois os Cristiano Ronaldo, Bruno Fernandes, João Félix e compañía terán que sacar o boleto para o emirato na repesca.
Os portugueses dependían de si mesmos, mais caeron 1-2 ante Serbia a pesar do tanto de Renato Sanches nos segundos iniciais.
