O pasado 19 de novembro Ana Peleteiro, a mellor atleta galega do momento, facía público o nacemento da súa filla Lúa.
Agora, pouco máis de seis meses despois de ser nai, a de Ribeira anuncia o seu regreso á competición.
"Por fin chegou o momento, o meu momento. Tras máis de 15 meses fóra das pistas e cinco despois de realizarme como mamá... volvo!", revelou nas súas canles sociais.
"E esta vez máis forte, máis madura e con máis ganas que nunca. Vémonos o próximo 14 de xuño no Meeting Internacional de Castellón!", confirmou, asegurando así a súa presenza na cita levantina.
Xa que logo, a deportista de 27 anos regresa a tempo de tratar de conseguir a meta de estar nos Xogos Olímpicos de París 2024 e intentar revalidar o seu bronce en Toquio.
Daquela, a galega chegou no seu primeiro intento até os 14.55, a só 7 centímetros da súa marca persoal, e logrou ir mellorando; tras dous saltos nulos, fixo os 14,87 metros que lle deron o metal.
A discípula de Iván Pedroso fixo o mellor salto da súa carreira no Estadio Nacional de Toquio para situarse na elite deste deporte. Na súa primeira cita olímpica xa colocou o listón no bronce. Agora só queda saber do que será capaz, de clasificarse, en París.
