Cuarta edición este 16 de marzo

Yolanda Castaño, Germán Díaz ou Eva Mejuto na Feira do Libro de Monterroso

A Feira do Disco e o Libro Galego de Monterroso consolídase. Para a cuarta edición, que se celebrará na vila ulloá este sábado 16 de marzo, a asociación cultural 25 Xastres preparou un completo programa de presentacións, concertos e obradoiros.
 

cúpula
photo_camera A Cúpula de Monterroso, onde se celebra a Feira do disco e Libro Galego. Foto: cedida.

Cociñando con Bolboretas no Bandullo é un taller gastroliterario para cativas e cativos que, ás once da mañá, abrirá o encontro. Seguirao a presentación do segundo libro de Diego Giráldez, Hotel para coleccionistas discretos (Galaxia, 2019). Ás once e media, Toño Núñez falará do seu, A gotiña viaxeira.

cartaz

Ás doce do mediodía, Chuches Amil, o proxecto musical infantil de Fran Amil, ofrecerá o seu espectáculo Monstros. Cincuenta minutos despois, Inma López Silva presentará Chámame señora pero trátame como un señor (Galaxia, 2018), o seu ensaio sobre o machismo na cultura. As actividades de mañá rematarán coa presentación do disco Fonsagrada, do Candorka Trío.

aCentral Folque e a súa colección Cámara Escura reanudarán a feira a partir das catro e dez da tarde. Ás cinco menos cuarto, Cairón, o boletín do Instituto de Estudos da Ulloa, amosará aos asistentes o seu terceiro número. Paco Nogueiras dará un “concerto para nen@s” baseado en RadioBuleBule.

O puño e a letra (Xerais, 2018), o experimento co que Yolanda Castaño investiga nas relacións entre poesía e banda deseñada, terá a súa quenda ás seis e vinte. Benxamín Otero e Germán Díaz amosarán o seu novo proxecto, Trece cancións bonitas, ás sete e cuarto. Ás oito, Eva Mejuto fará o propio coa súa novela Memoria do silencio (Xerais, 2019).

O acto que pechará a Feira do Disco e o Libro Galego será un concerto de Zoelas, que estrean o seu álbum evelaités. Durante a xornada, autoras e autores como Carlos Meixide, a poeta local Ana Vila, Xosé Duncan, Estefanía Padullés, Adolfina Mesa ou Strazz asinarán exemplares das súas obras nalgún dos múltiples postos de editoriais, libraría, discográficas que poboarán a Cúpula de Monterroso.

“A feira é un punto de encontro en que poder disfrutar da cara máis lúdica da cultura e que pretende dar visibilidade e potenciar estes dous medios de difusión cultural nun mesmo espazo e co galego como lingua vehicular”, expón a organización.

Nota: cartaz da IV Feira do Libro e Disco Galego de Monterroso.

Comentarios