venres 28.02.2020

A Xunta segue, 18 meses despois da solicitude, sen declarar BIC as pezas do Mestre Mateo en mans dos Franco

'O Sorriso do Daniel' solicitou formalmente en outubro de 2017 esa medida, sen ter a día de hoxe noticias ao respecto. A asociación anuncia que informará á Unesco da situación de desprotección destas pezas.

abraham e isaac
abraham e isaac

Abrahan/Xeremías e Isaac/Ezequiel son dúas pezas feitas no séculos XII e XIII polo Mestre Mateo. Dúas pezas talladas entre 1188 e 1211 por Mateo para que figurasen no Pórtico da Gloria da Catedral de Santiago de Compostela e que actualmente están en posesión da familia Franco.

En outubro de 2017 a asociación ‘O Sorriso do Daniel’  solicitara formalmente a incoación dun expediente de Ben de Interese Cultural (BIC) a estas dúas pezas. Porén, 18 meses despois, esta asociación no  ten noticia alguna ao respecto e lembra que o prazo máximo para concluír o expediente é de 24 meses. “Este retraso non fai máis que alargar a sombra de desleixo da administración nun caso que debía sr tramitado xa hai anos”.

Nun escrito dirixido á Dirección Xeral de Patrimonio, O Sorriso do Daniel solicita a “conclusión favorábel” do expediente de declaración BIC destas pezas e piden que a administración lles informe do estado no que está o procedemento.

Indica tamén que se poñerán en contacto coa Unesco e con Icomos para “alertalas” da situación de desprotección en que poderían estar estas figuras en posesión da familia Franco.

comentarios