Perderon a condición de “nacionais” que tiñan na súa orixe e tamén a dotación económica pero a Xunta non deixou de convocar os Premios da Cultura Galega que onte se fallaron cun xurado presidido polo propio Xesús Vázquez na Cidade da Cultura. Desta volta, os premios oficiais da Xunta recoñecen a Luz Pozo Garza na categoría de Letras; a Fundación Granell na de Artes Plásticas; a Asociación Abrente-Mostra Internacional de Teatro de Ribadavia nas Artes Escénicas; o Castro de Viladonga en Patrimonio Cultural; o Colexio Santiago Apóstolo de Bos Aires en Proxección Exterior; Juan Durán en Música; Bambú Producciones na modalidade Audiovisual e a Asociación PuntoGal para a nova categoría de Lingua.
Unha serigrafía do pintor “Alexandro” será o recordo que cada persoa ou entidade premiada reciba no acto de entrega dos galardóns. O xurado, ademais do conselleiro, estivo composto polo secretario xeral de Cultura, Anxo Lorenzo; Francisco Díaz- Fierros Viqueira e Ramón Durán Villa en representación do presidente do Consello da Cultura Galega e do reitor da Universidade de Santiago de Compostela. Pola Real Academia Galega participou Henrique Monteagudo e pola de Belas Artes Nosa Señora do Rosario, Ramón Yzquierdo Perrín. A Consellaría completou o xurado con persoas “de prestixio no ámbito cultural”, apartado no que foron convocados o profesor e membro da RAE, Darío Villanueva, a crítica de arte, Fátima Otero, a profesora da Universidade de Vigo, Victoria Carballo-Calero e o actor Antonio Mourelo.
