A figura -ou mesmo lenda- da autora protagonista das Letras Galegas deste ano, Xela Arias, volve presentarse ao público, desta vez grazas ao simposio organizado pola Real Academia Galega (RAG) que deu comezo esta quinta feira. A cita divídese en tres xornadas dedicadas á vida, á voz poética e ao seu papel na tradución e noutras artes máis aló da escrita.
Na estrea deste novo espazo na axenda cultural da RAG, as e os relatores falaron da "muller loitadora e temeraria que non se deixou levar nunha pola covardía". Aludindo á súa decisión de espirse na escrita, nesta quinta feira foi momento de indagar na súa vida e no seu compromiso.
"Xela Arias significa un vento fresco na poesía e na creatividade galega das derradeiras décadas do século pasado", sinalou antes do comezo das diferentes quendas o presidente da Academia, Víctor Freixanes.
No seu discurso, engadiu que a homenaxeada deste ano nas Letras Galegas "representa tamén o pulo e a creatividade dunha xeración, especialmente importante na renovación do discurso cultural na procura de novas formas de modernidade".
Após Freixanes, forneceron ao público as súas impresións o fillo da autora, Darío Gil Arias, e as que foran as súas amigas, a profesora da Universidade de Vigo Ana Iglesias e a escritora Marga do Val.
O primeiro revelou: "Este ano fixo que me achegase aínda máis á miña nai e descubrise perfís até o momento descoñecidos para min".
"Ademais de natural, fronte ao impostado e opulento, e libertaria, ela sempre foi unha loitadora", reflexionou, após lembrar que ía canda ela a actos, encontros ou movementos como Nunca Máis.
Para a escritora e colaboradora de Nós Diario, Marga do Val, Arias foi un corpo en rebeldía que dinamitou fala e espazo. "Entrou no texto e foi texto, destruíndose(nos) e deconstruíndose(nos), coa marxe e na marxe, tamén dinamitadora da fala". Aludindo a algunhas das súas obras, comentou a "revolución estética contra ao puritanismo" ou a súa representación "negra por elección".
Pola súa banda, a docente Ana Iglesias destacou que "as escollas vitais de Xela Arias van conformando unha persoa que non se deixa arrastrar polo estabelecido e que é quen de ir contracorrente, aínda que iso conduza ás veces á soidade e o individualismo".
As novas citas terán lugar o 18 e o 25 de novembro. Participarán María Xesús Nogueira, Chus Pato, Alba Cid, Manuel Bragado, Ana Luna, Belén López Rodríguez e María Yáñez.
