O Xardín das Pedras que Falan, sito no xardín de Fonseca, en Santiago, conta dende hoxe cos versos de tres novas poetas: Olga Novo, Laura Pugno e Moon Chung Hee. As pedras cos seus textos foron descubertas esta sexta feira a mediodía, nun acto presidido polo alcalde, Xosé Sánchez Bugallo, que felicitou ás elixidas sinalando que "pasan a formar parte permanente, para sempre, da vida de Santiago".
Olga Novo di nestes versos que "a última vangarda é o amor". Para Laura Pugno "aflora a palabra como un pedazo de óso, un pensamento entre a mente e a herba". E Moon Chung Hee, a única ausente, escribiu: "son eu o único xeito de atoparme. Baixo o ceo cheo da pregunta". Estas tres novas pedras suman quince, das 42 previstas no proxecto.
No acto tamén estaban presentes o reitor da Universidade de Santiago, Antonio López; a concelleira de Acción Cultural, Mercedes Rosón; e Claudio Rodríguez Fer, director da Cátedra Valente de Poesía e Estética da USC e un dos impulsores do proxecto xunto ao escritor Suso de Toro, así como os edís Branca Novoneyra e Jorge Duarte, de Compostela Aberta.
O "Xardín das pedras que falan" xorde en 2018 grazas á colaboración entre o Concello e a USC, que fan realidade un proxecto concibido polo escritor Suso de Toro. Tratábase de crear unha espiral con diferentes pedras, nas que se gravan liñas ou versos inéditos asinados por escritores e escritoras de diferentes países e diferentes linguas.
Xa son quince os autores e autoras lembrados no xardín. As pedras cos textos de Olga Novo, Laura Pugno e Moon Chung Hee súmanse aos de Marta Pessarrodona, Kerstin Hensel, Zéno Bianu, Bernardo Atxaga, Ramón María del Valle-Inclán, Antonio Gamoneda, Rosalía de Castro, Seamus Heaney, Luz Pozo Garza, Salvador García-Bodaño, Adonis e José Ángel Valente.
