mércores 28/10/20

Vinte poetas recitarán o 1 de maio en “Mondoñedo é poesía”

Mondoñedo gábase da súa indiscutíbel tradición poética e reúne o próximo día 1 de maio vinte voces contemporáneas da poesía galega nun encontro no que se evocará a súa riqueza literaria. “Mondoñedo é poesía” terá lugar o vindeiro 1 de maio. 

Leiras Pulpeiro
Leiras Pulpeiro

O Grupo Literario Leiras Pulpeiro (GLLP) máis a Asociación As San Lucas, que organiza as Feiras e Festas das Quendas 2014, organizan para o 1 de maio un recital poético-musical que xuntará en Mondoñedo vinte das voces actuais da poesía galega. 

O Grupo Literario Leiras Pulpeiro (GLLP) e a Asociación As San Lucas, responsable da organización das Feiras e Festas das Quendas 2014, preparan para o vindeiro 1 de maio un recital poético-musical denominado “Mondoñedo é poesía”.

Alicia Fernández, Carlos Negro, David Otero, Dores Tembrás, Henrique Rabuñal, Iolanda Aldrei, Isidro Novo, José Juan Ferrrero, Mª Xosé Lamas, Marica Campo, Mario Regueira, Baldomero Iglesias “Mero”, Olalla Cociña, Paco Rivas, Toño Núñez, Xabier Cordal, Xacobo Casal, Xaime Oroza e Xoán Xosé Abella recitarán no encontro “Mondoñedo é poesía” que contará tamén coa música de Miro Casabella e César Morán, que interpretará poemas de Manuel Leiras Pulpeiro. 

Itinerario literario

Rúas e outros espazos da localidade faranse eco da nova poesía tomando relevo á tradición literaria de Mondoñedo, e evocarán a súa condición creativa vinculada a nomes de relevancia da historia poética galega como Noriega Varela, Álvaro Cunqueiro, Xosé Díaz Jácome ou Manuel Leiras Pulpeiro ademais da coñecida como Escola Poética do Seminario de Mondoñedo no que se inclúen nomes como Xosé Crecente Vega, Aquilino Iglesia Alvariño ou Xosé Díaz Castro. Para reforzar a idea de “concello literario”, as entidades organizadoras lembran que en Mondoñedo convócanse dous premios anuais, o “Premio de Poesía Díaz Jácome” e o “Premio de Poesía Leiras Pulpeiro”.

O programa iniciarase ás 13:00 cunha recepción institucional no concello para, despois do xantar, por volta das 18:00 horas comezar os recitais seguindo un itinerario por lugares singulares e de relevancia histórica e literaria como son o Cemiterio Vello, a Praza do Concello,  a Praza da Catedral, a Fonte Vella, O Cristo e  a Praza Jaime Cabot. A seguir, ás 19:30 será o Auditorio Pascual Veiga o que acolla o recital poético-musical coa intervención de poetas e músicos. O Grupo Literario Leiras Pulpeiro (GLLP) máis a Asociación As San Lucas queren que o 1 de maio Mondoñedo sexa a “capital galega da poesía”.

comentarios