Verán en terra de festivais

Un verán máis Galicia prepárase para encherse de festivais. Son cada vez máis as citas musicais deste tipo que se programan ao longo da nosa xeografía, un modelo que semella non atopar teito. Chegados a este punto resulta difícil asegurar cantos festivais se celebran en Galicia, o que é certo e que a día de hoxe son xa máis dun cento para este verán, a maioría deles durante o mes de xullo que suma máis de trinta eventos, mentres que agosto e setembro rozan esta cifra e xuño supera os vinte. Unha enorme oferta de festivais que non sempre reflexa a mesma variedade musical. Para ver Xoel López en directo este verán nun festival galego non faltan opcións. O coruñés tocará en Santiago en O Son do Camiño o 16 de xuño, pero tamén estará coa súa banda Deluxe en Caldas de Reis durante o festival Portamérica en xullo. En setembro tamén se poderá ver Xoel López actuando en solitario no festival Osa do Mar de Burela, no Barbeira Season Fest de Baiona e de novo con Deluxe nas Noites do Porto da Coruña. Os mesmos carteis Non é ningún segredo, os carteis de boa parte dos festivais galegos aseméllanse moito entre si. Moitos destes eventos repiten artistas e buscan atraer o público da súa zona ou apostar por diferenciarse polo contorno no que se celebran. Isto non supón nada malo, pero ante unha oferta tan ampla de eventos ao longo de toda Galicia cabe preguntarse se todas estas citas musicais poderán sosterse no tempo ao ofrecer propostas moi semellantes. Sorprende especialmente que ante un panorama cun risco real de estar saturado, o propio Goberno galego impulse varias propostas como o propio macrofestival O Son do Camiño en Santiago de Compostela, no mesmo espazo no que este ano tamén impulsou o ciclo de concertos Gozo Festival. Todo isto con carteis onde a presenza de artistas galegos é marcadamente minoritaria. De feito, os artistas que acostuman conformar os carteis dos festivais en moitas ocasións non teñen nada que ver cos que enchen a programación das salas de concertos galegas. Os proxectos locais e máis atrevidos non acostuman ter un espazo destacado en moitos festivais, nos que o público tamén é diferente ao dos concertos que se celebran o resto do ano. En moitos festivais a música non é o elemento central, pero como con todo, hai excepcións. A presenza de artistas galegos en festivais como O Son do Camiño ou Gozo Festival é marcadamente minoritaria Entre este máis dun cento de festivais de verán galegos, hai tamén propostas cunha identidade propia capaces de diferenciarse ao ofrecer unha experiencia diferente en moitos casos incluso á de calquera outro festival de toda a península. Un exemplo claro é o outro xigante galego, o Resurrection Fest de Viveiro, coa súa aposta polo metal que o posicionou como unha cita obrigada cada verán para moitos seguidores deste xénero. Nesta edición que comezará a finais de xuño actuarán nomes tan destacados como Slipknot ou Alter Bridge. Do Sinsal e ao WOS Festival Pero o Resurrection Fest está lonxe de ser a única proposta con identidade propia entre os festivais galegos. Un caso único é o do Sinsal, que se celebra na Illa de San Simón, na ría de Vigo. Ademais da súa localización privilexiada, outro dos factores que fai exclusivo este festival é o cartel secreto. Antes de coller os barcos ata a illa, ningún dos asistentes sabe que artistas vai atopar actuando en cada un dos seus recunchos, un exercicio de confianza que o festival gañou co seu público ao longo dos anos. Este ano ten lugar a finais de xullo e en edicións anteriores reuniu artistas como Mercedes Peón, Lina &amp; Raül Refree, María Arnal i Marcel Bagés, Sons of Kemet ou Chelsea Wolfe. Outro dos festivais con maior identidade propia de Galicia é o WOS Festival. Neste caso o cartel é un dos principais factores. O WOS Festival fai unha aposta clara pola música de vangarda, especialmente a electrónica, traendo a Santiago de Compostela artistas internacionais que resultarían imposibles de ver en Galicia en ningún outro contexto e en ocasións mesmo en toda a península máis alá de festivais como o Sónar de Barcelona. Ademais, trátase dun festival que aproveita o contorno no que se celebra para acoller os seus concertos. En lugar de buscar un recinto nas aforas da cidade onde establecer os escenarios, o WOS Festival celébrase nas propias salas da zona vella de Santiago, dende a Sala Capitol, ata o Teatro Principal pasando pola Igrexa da Universidade, que se transforma por completo coa iluminación atmosférica e a música. Este ano aínda non presentou o cartel nin anunciou datas, pero acostuma ser un dos últimos festivais da tempada xa no mes de setembro.